Украл автомобил од 2 милиони евра во текот на тест возење
Германската полиција трага по класичниот модел Ferrari 288 GTO отуѓен од сопственикот од страна на човек кој се претставил како потенцијален купувач на автомобили.
Ferrari 288 GTO е украден во Дизелдорф во понеделникот, откако сопственикот се сретнал со лицето кое закажало пробно возење. Крадецот кој седел на совозачкото место, го искористил моментот кога сопственикот излегол од автомобилот и веднаш ги заменил местата.
Тој скокнал на возачката позиција и заминал со скапоценото класично Ferrari.
Полицијата во Дизелдорф во вторникот се огласила по повод овој случај и соопштила дека не успеала да го лоцира украденото возило за кое се проценува дека вреди околу 2 милиони евра.
Ferrari во 80-тите години произвел само 272 примероци од моделот 288 GTO. Автомобилот за погон користи 2,9-литарски твин-турбо V8 кој произведува 400 коњски сили и 496 Nm.
Во последните неколку години, на овој модел значајно му скокнала цената на пазарот на класичните суперспортски автомобили, пред сè затоа што е многу редок и помалуброен од познатите Ferrari F40, F50 и Enzo кои подоцна го наследија.
