Пијалакот на кој особено укажуваат е ароматизираното лате, односно лате со сирупи, засладено млеко и други додатоци. „Латето со вкус всушност не го забавува метаболизмот, но големо, засладено лате секој ден може да го отежне одржувањето на здрава телесна тежина“, објаснила диететичарката Лиза Јанг за „EatingWell“. Само две лажици од некои сирупи можат да содржат 23 грама шеќер и околу 90 калории.

Течните калории брзо се насобираат

Проблемот е и во тоа што напитокот често не дава исто чувство на ситост како цврстата храна. „Тоа значи дека можете да испиете лате од 300 или 400 калории, а потоа сепак да изедете вообичаен појадок или ужина“, објаснила Јанг. Диететичарката Лорен Твиџ додала: „Иако многу лате-напитоци имаат калориска вредност како оброк, им недостигаат хранливи материи што обезбедуваат ситост, како што се протеините, влакната и мастите“.

Повременото ароматизирано лате не е проблем, но секојдневната навика може да го зголеми вкупниот внес на калории. „Кога висококалоричниот кафе-напиток ќе стане автоматски дневен ритуал, дополнителните калории можат да се насоберат без воопшто да бидете свесни за тоа“, предупредила Јанг.

Ако често пиете таков напиток, едноставните промени, како помала порција, помалку сируп или помалку засладена верзија, можат да ја намалат количината на шеќер и калории. Како поедноставни опции, диететичарките ги издвојуваат водата, незасладеното кафе и зелениот чај.

„Кафето содржи кофеин, кој може привремено да ја зголеми потрошувачката на енергија, заедно со природни антиоксиданти кои можат да го поддржат целокупното метаболичко здравје“, истакнала Твиџ, со напомена дека ефектот е умерен. За здрав метаболизам поважни се долгорочните навики, како урамнотежена исхрана, физичка активност, доволно сон и редовно внесување вода.