Кога BMW минатата година ја лансираше втората генерација на моделот X2, го направи овој хибрид на кросовер и купе многу поголем од неговиот претходник.
Тоа поттикна многу вљубеници во BMW автомобилите да се запрашаат дали Х4 има иднина во сè поголемата гама на баварскиот бренд.
Сега го знаеме одговорот - нема. Претставниците на компанијата изјавија за „Motor1 Italy“ дека ривалот на Mercedes GLC Coupe нема да ја дочека новата (трета) генерација. Од BMW објаснуваат дека веќе нема место во гамата за X4 сега кога X2 порасна.
Разликата во цената меѓу двата модели е значително намалена, па нема смисла да се задржат и двата во понуда. Оние на кои им треба поголемо, поотмено SUV-купе го имаат на располагање пионерот во овој автомобилски сегмент, BMW X6.
BMW не открива кога планира да го прекине производството на X4. Со оглед на тоа дека испораките на новата генерација на BMW X3 започнуваат на крајот на оваа година, логиката нѝ кажува дека дериватот во форма на купе нема да се задржи уште долго. Се чини малку веројатно дека моделот ќе опстане по 2025 година.
Иако BMW X4 со мотори со внатрешно согорување се соочува со неминовен крај, можеби постои индиректен наследник. „BMWBlog“ известува дека целосно електричниот iX4 треба да пристигне околу 2027 година на механичката платформа Neue Klasse.
Компанијата со седиште во Минхен соопшти дека ќе лансира најмалку шест електрични возила на нови наменски основи до 2028 година.
BMW iX4 може да биде еден од нив, заедно со веќе потврдениот iX3 кој доаѓа во 2025 година и седанот i3 во 2026 година.
