Откако доби условна казна затвор од 60 дена со пробен период од една година за навреда на полицијата, на Сергеј Трифуновиќ му е откажан краткотрајниот престој во Хрватска. Сопругата на Сергеј Трифуновиќ, Исидора Мијановиќ, се огласи по објавувањето на информацијата за неговата пресуда.
Таа накратко кажа како се чувствува сега актерот:
„Во моментот сме заедно со Сергеј. Тој се чувствува добро, во контакт сме со адвокати и ја решаваме оваа ситуација. Го очекувавме овој исход, па не нè изненади. Не можам повеќе да коментирам“, изјави Исидора Трифуновиќ за српски „Телеграф“.
Претходно, видно потресената Исидора Мијановиќ од Риека раскажа што се случило на граничниот премин Бајаково каде актерот беше уапсен во вторникот околу полноќ.
„Кога ја поминавме српската граница и влеговме во Хрватска, тие веднаш го уапсија. Ситуацијата беше апсурдна. Излеговме од автомобилот, тие само ни рекоа дека има проблем и дека наскоро ќе дојде колега да објасни. Мислев дека ќе се реши за неколку минути. Нивниот колега, граничен чувар, се приближи и рече: ‘Морам да те уапсам’. Помислив дека е шега, но набрзо сфатив дека не е“, тврди Исидора.
„Сергеј веднаш сакаше да повика адвокат, но тие му забранија да го стори тоа иако не беше уапсен. Во тој момент се одвоив од нив на метар или два и повикав адвокат. Тие му ставија лисици на Сергеј и го однесоа во непознато место. Заминав со нив и таму започна агонијата од два и пол часа. Не сакаа да кажат зошто го уапсиле. Голема непријатност од страна на полициските службеници. Нему му беше забранет влез во ЕУ поради неговите објави на Инстаграм. Тоа беше готово, а сега има нешто ново. Вчера дознавме дека се работи за фотографија што ја сподели на социјалните мрежи, па ја избриша“, додала Исидора за „Нова“.
Да потсетиме, Сергеј Трифуновиќ е уапсен во вторникот околу полноќ на граничниот премин „Бајаково“ додека преминувал од Србија кон Хрватска. Потоа бил спроведен во Општинскиот суд за прекршоци во Сплит. Трифуновиќ пред судот изјави дека не се чувствува виновен за она за што е обвинет.
