Историјата ќе биде испишана во ноќта понеделник кон вторник во САД. Кошаркарот Оливие Риу (18) ќе дебитира за универзитетскиот тим на Флорида Гејторс и веројатно неговото деби немаше да привлече големо внимание доколку тој не беше највисокиот тинејџер на светот.
Имено според Гинисовата книга на рекорди, Канаѓанецот е највисокиот тинејџер на светот со висина од 2,40 метри, а веќе во шесто одделение бил висок 2,10 метри, а на 16 годишна возраст стасал до 2,24 метри.
„Секој ден ме прашуваат за мојата висина. Не сум сигурен зошто сум толку висок. Бевме кај многу лекари. Најверојатно тоа е генетиката на моето семејство“, изјави Риу, кој ќе стане највисокиот кошаркар кој играл во колеџ лигата.
Неговата мајка е висока 1,83 метри, неговиот татко е висок 2,07 метри, а неговиот брат е висок 2,10 метри.
Поради неговата висина, Риу има проблеми со влегувања низ вратите, спиењето в кревет, а бројот на чевлите му е неверојатни 57,5, и носи само облека специјално сошиена за него.
Риу сака да стане успешен колеџ – кошаркар, а има настапувано за Канада, на Светското првенство за играчи до 19 години во 2023 година.
Риу може да забива кошеви стоејќи, а според неговиот тренер Тод Голден, тој е исклучително агилен со оглед на неговата висина.
Неговиот сон е да игра како НБА ѕвездата Виктор Вембањама, кој е висок 2,21 метар и изгледа речиси мал во споредба со Риу, кој се надева дека ќе стане барем солиден кошаркар.
