Јапонскиот производител на автомобили "Nissan" денеска објави дека бил принуден да отпушти 9.000 вработени и да го намали производството за 20 отсто, бидејќи продажбата на неговите автомобили значително се намалила.
Во претходниот квартал, "Nissan" забележа загуба од 9,3 милијарди јени (55 милиони евра), што е намалување од добивката од 190,7 милијарди јени во истиот квартал пред една година.
Компанијата објави приход од продажба во првата половина од 5,98 трилиони јени (36 милијарди евра), што е за 1 отсто помалку од повеќе од 6 трилиони јени во истиот период минатата година. Кварталната продажба падна од 3,1 трилиони јени на 2,9 трилиони јени (15 милијарди евра).
Моделите на "Nissan" не се продаваат добро во САД, еден од најпрофитабилните пазари за автомобили во светот, на кој неодамна доминираа "Ford", "Toyota" и "Tesla".
Извршниот директор на компанијата Макото Учида рече дека ќе си ја намали сопствената плата за 50 отсто за да преземе одговорност за лошите резултати.
Учида призна дека "Nissan" не реагирал доволно брзо или флексибилно на глобалните промени, вклучувајќи ги вкусовите на пазарот и зголемените трошоци за суровини, како и тоа дека сите аспекти на работењето и плановите на "Nissan" ќе бидат анализирани.
"Nissan" ја намали прогнозата за продажба за фискалната година до март 2025 година на 12,7 трилиони јени (76 милијарди евра) од претходната проекција од 14 трилиони јени (84 милијарди евра).
Компанијата очекува да продаде 3,4 милиони возила ширум светот во фискалната година што завршува во март 2025 година, што е помалку од претходно проектираните 3,65 милиони возила.
