Портпаролката Марија Захарова беше среде конференција, а новинарите и поставуваа прашања, кога нејзиниот мобилен телефон заѕвони со наводна наредба.

Се слуша глас преку телефон кој и наложува да „не коментира“ за нападот над Украина во раните утрински часови.

„Маша, ударите со балистички ракети на Јужмаш во Днепар, ова што зборуваат на Запад, не го коментирај“, се слушна гласот преку телефон.

Делови од нивниот разговор можеа да се слушнат преку два микрофони поставени пред неа.

Ако се потврди дека Владимир Путин лансирал "ICBM", тоа би било првпат да се користи толку моќно оружје со долг дострел за време на инвазијата.

Во нападот на Днепар, наводно била лансирана "ICBM", како и неколку други балистички ракети.

Се верува дека употребата на "ICBM" е одговор на Русија на одлуката на САД да и дозволи на Украина да користи "ATACMS" длабоко во руската територија.

Западен функционер се сомнева дека се работи за "ICBM"

Западен функционер изјави за новинарите дека проектилот што го лансираше Русија е балистичка, но не и интерконтинентална балистичка ракета.

Официјалниот претставник одби дополнително да ја опише ракетата, велејќи дека нејзините ефекти сè уште се проценуваат.

Захарова се закани со уништување на базата во Полска

Русија утрово се закани дека ќе ги нападне американските воздушни бази во Полска со „напредно оружје“ само неколку часа откако наводно лансирала интерконтинентална балистичка ракета како дел од бруталниот напад на цели низ Украина.

Москва рече дека отворањето на новата американска база за балистичка ракетна одбрана во Реџиков, во близина на балтичкиот брег, „го зголемува целокупното ниво на нуклеарна опасност“, додавајќи дека базата е додадена на руската листа на потенцијални цели.

Објектот, кој беше отворен на 13 ноември, е дел од поширокиот противракетен штит на НАТО наречен "Aegis Ashore", кој е дизајниран да пресретнува балистички ракети со краток и среден дострел.

„Ова е уште еден отворено провокативен чекор во низата длабоко дестабилизирачки акции на Американците и нивните сојузници“, рече Марија Захарова по повод отворањето на базата.

„Базата е додадена на листата на приоритетни цели за потенцијално уништување, што, доколку е потребно, може да се изврши со широк опсег на напредно оружје“, заклучи таа.

Нејзината изјава дојде неколку минути откако украинските воздухопловни сили објавија дека рано утринава била истрелана интерконтинентална балистичка ракета од база во јужна Русија, во регионот Астрахан во близина на Каспиското Море.