Разлики меѓу метанолот и етанолот

„Метанолот и етанолот имаат различни хемиски структури. Метанолот се состои од само еден јаглероден атом, додека етанолот има два“, пишува Иан Масгрејв, виш предавач по фармакологија на „Универзитетот во Аделаида“.

Тој еден јаглероден атом ја прави целата разлика. Ова значи дека метанолот се обработува поинаку во нашите тела и е многу поотровен од етанолот.

Метанолот се користи во различни индустриски производи и производи за домаќинството, како што се течности за чистење на шофершајбната, антифриз и гориво. Тој не е безбеден за консумирање во човечката исхрана.

Што го прави метанолот токсичен?

Разликата е во начинот на кој метанолот се разградува во нашите тела.

Етанолот се метаболизира во хемиско соединение наречено ацеталдехид. Ацеталдехидот е токсичен, но брзо се претвора во ацетат (познат и како оцетна киселина, кој се наоѓа во оцетот). Правењето киселина можеби звучи лошо, но ацетатот всушност произведува енергија и создава важни молекули во телото.

За разлика од етанолот, метанолот се метаболизира во формалдехид (хемикалија која се користи во индустриските лепила и за балсамирање трупови), а потоа во мравја киселина. За разлика од ацетатот, кој телото го користи, мравјата киселина ги труе митохондриите. Како резултат на тоа, лицето кое е изложено на метанол може да влезе во тешка метаболна ацидоза, што е состојба кога се акумулира премногу киселина во телото.

Труењето со метанол може да предизвика гадење, повраќање и болка во стомакот. Ацидозата потоа предизвикува депресија на централниот нервен систем, што може да предизвика луѓето да се онесвестат или да паднат во кома. Исто така, ацидозата може да доведе до оштетување на мрежницата, што доведува до губење на видот. Тоа е така затоа што мрежницата е полна со активни митохондрии кои се подложни на оштетување.

Ако се консумира мала количина на метанол, тоа не значи дека личноста ќе умре, а навременото лекување во голема мера ќе ја намали штетата.

Сепак, трајното оштетување на видот може да се случи дури и во несмртоносни дози ако медицинскиот одговор е премногу бавен.

Што вклучува лекувањето?

Лекувањето е главно нега, како што е интубација и механичка вентилација што му помага на пациентот да дише. Може да вклучува и лекови како што е фомепизол (кој го инхибира формирањето на токсична мравја киселина) и дијализа за отстранување на метанолот и неговите метаболити од телото.

Како метанолот стигнува до алкохолните пијалаци?

Метанолот може да се појави во секој алкохолен пијалак, но најмногу во пијалаци со поголема содржина на алкохол, како што се овошните вина.

Метанолот може да навлезе во алкохолните пијалаци на неколку начини. Понекогаш се додава намерно и незаконски за време или по производството како поевтин начин за зголемување на содржината на алкохол во пијалакот.

Исто така, традиционалните методи на подготовка може ненамерно да генерираат метанол, како и етанол и да произведат токсични нивоа на метанол во зависност од микробите и видовите растителни материјали што се користат во процесот на ферментација. За да избегнете труење со метанол, треба да бидете внимателни со коктелите и жестоките пијалаци, да пиете само во реномирани лиценцирани места и да избегнувате домашни жестоки пијалаци.