Али Амини бил прагот да започне нов живот во Соединетите Држави кога претседателот Доналд Трамп минатата недела ја запре помошта за преселување на авганистанските бегалци, потег за кој Амини е загрижен бидејќи може да го доведе во опасност неговиот живот доколку биде принуден да се врати дома.
Откако неговите податоци биле обработени во Албанија, тој имал резервирано лет и неговите куфери биле спакувани кога Трамп ја суспендирал владината помош потребна за транспорт на десетици илјади Авганистанци на кои им биле одобрени визи.
„Не знам дали некогаш ќе се качиме во тој авион и, ако е така, дали ќе замине во Кабул или во САД“, рекол Амини од Шенџин, приморски град на северот на Албанија каде што е сместен со 300 сонародници.
Замрзнувањето на странската помош на Трамп доведе до суспензија на летовите за повеќе од 40.000 Авганистанци на кои им биле одобрени специјални американски визи. Тие се изложени на ризик од одмазда од талибанците, изјавил за „Ројтерс“ во саботата Шон Ван Дивер, шефот на коалицијата на американски ветерани и адвокатската група „AfghanEvac“ (Авганистан Евак).
Амини пристигнал во Албанија пред повеќе од еден месец и обезбедил визи во главниот град Тирана за неговата сопруга и трите деца, од кои најмалото имало шест месеци.
По хаотичното повлекување на САД од Авганистан во 2021 година, илјадници кои работеле за американската војска или други организации биле процесирани во Албанија и им биле дадени визи пред да патуваат во Соединетите држави.
Кога ја слушнала веста од Трамп, сопругата на Амини се расплакала додека нивните деца се загрижиле за иднината.
Откако работел како бравар за американските војници пред нивното повлекување од Авганистан во 2021 година, Амини се криел три години поради страв од одмазда на Талибанците.
„Ако се вратиме, ќе нè убијат затоа што за Талибанците во основа сме Американци и нивни непријател број еден, затоа што работевме рамо до рамо со Американците.“
„Повеќето од оние кои се погодени од одлуката на Трамп се заглавени во Авганистан, а останатите се во Пакистан, Катар и Албанија“, рекол Ван Дивер.
Наредбата, исто така, го поттикнала Стејт департментот да го прекине финансирањето на групите кои им помагаат на Авганистанците со специјални имигрантски визи (СИВ) да најдат станови, училишта и работа во САД.
Речиси 200.000 Авганистанци заминале во САД со „SIV“ визи или како бегалци од 2021 година. Кампањата за реизбор на Трамп вклучувала ветувања за строги политики за имиграција.
Садат (27) пристигнал во четвртокот откако отпатувал од Кабул во Дубаи, потоа Кувајт, Истанбул и на крајот Тирана, со група од околу 130 луѓе.
„Моите пријатели во Кабул ми велат дека сум среќен затоа што можеби тоа беше последниот авион со луѓе како нас“, рекол Садат, истакнувајќи дека во саботата бил информиран за интервјуто за виза закажано за следната недела.
„Работите се менуваат секој час, а чекањето до следната недела е како цел живот. Толку сум загрижен“, додал Садат.
Извештаите од мисијата на Обединетите нации во Авганистан покажуваат дека талибанците апселе, мачеле и убиле поранешни војници и службеници на претходната влада поддржана од САД. Талибанците тврдат дека издале општа амнестија за поранешни војници и владини функционери.
„Не можеме да се вратиме во Авганистан бидејќи веќе сме во Америка за талибанците и ќе нè третираат како шпиони“, објаснил Садат.
„Господине Трамп, не праќајте нè под нож кај касапите од Кабул“, замолил друг Авганистанец, кому визата му истекува за две недели.
