„Да се игра за Хрватска е светост, тоа е неопислива љубов“, изјави Лука Модриќ додека се присетуваше на настани од своето детство.
Лука Модриќ денес е капитен на хрватската репрезентација и на Реал Мадрид, но неговиот пат до врвот бил исклучително тежок. Особено се издвојува неговото детство, обележано со војната во Хрватска, во која трагично загинал неговиот дедо. Иако ретко зборува на таа тема, пред неколку години, во серијалот „Капитени“ на "Netflix" и "FIFA", одлучи да ја отвори душата и да зборува за тоа.
„Тоа ми го обележа животот. Иако бев малечко дете, се сеќавам на некои работи. Дедо ми беше мојот заштитник, секогаш ме држеше покрај себе, дури и кога го чуваше стадото. Името го добив по него. Жал ми е што не доживеа барем дел од сето она што го постигнав, но сигурен сум дека ме гледа од горе и дека е горд“, изјави Модриќ.
Во тоа време Лука живеел со баба му и дедо му на Велебит. Дедото бил убиен пред нивната куќа, што оставило длабока трага кај младиот фудбалер. „Не беше лесно … сирени, гранати, живот во бегство, но кога ќе ги погледнам сликите од детството, секогаш сум со топка. Таа беше мојот излез од сето она што се случуваше околу нас“, раскажа Модриќ, па се осврна и на значењето што го има репрезентацијата за него.
„Многумина очекуваа дека по Светското првенство во Русија и освоеното финале ќе играм само за клубот, но нема подобро чувство од тоа да ја претставуваш својата земја. Желбата ми е да играм за репрезентацијата сè додека ме сакаат и додека чувствувам дека можам да помогнам. Свесен сум дека Катар беше моето последно големо натпреварување. Заминувањето ќе биде тешко и емотивно, но тоа е природниот тек. Нам мотивација ни беше генерацијата од 1998. Тие беа наши идоли и нашата цел беше да ја достигнеме нивната бронза од Франција. Успеавме и да ги надминеме. Да се игра за Хрватска е светост, тоа е неопислива љубов“, рече тогаш Модриќ, кој во меѓувреме настапи и даде свој придонес и на Европското првенство минатата година.
