Возачите на Формула 1 овој викенд повторно се подготвуваат за настап во Џеда, но ова може да биде еден од последните пати бидејќи саудиските власти се блиску до завршување на плановите за изградба на нов, спектакуларен комплекс во друг дел од земјата.

Новата Ф1 патека ќе се гради во Кидија, недалеку од Ријад. Станува збор за амбициозен проект кој го потпишуваат поранешниот Ф1 возач Алекс Вурц и познатиот дизајнер на патеки Херман Тилке. Проектот вклучува 21 свиок и дури 108 метри висинска разлика. Планиран е и првиот нагорен свиок, кој ќе се вика „Blade“, што ќе се издигнува 70 метри над просторот предвиден за концерти.

„Првиот град во светот изграден за игра“

Покрај патеката ќе се наоѓа тематскиот парк "Six Flags", кој ќе содржи највисоко, најдолго и најбрзо лизгалиште на светот. Компјутерските симулации на патеката прикажуваат и базен со стаклено дно поставен над самата патека.

Целиот комплекс се промовира како ново седиште на забавата и туризмот во Саудиска Арабија. Кидија веќе се рекламира со слоганот „првиот град во светот изграден за игра“. Патеката првично требаше да биде готова минатата година, за да може оваа сезона да ја пречека првата трка.

Но, Кидија сè уште е големо градилиште и веројатно патеката нема да биде завршена пред 2027 година. Можно е да поминат уште неколку години пред туристичкиот град да биде целосно подготвен. Тоа значи дека Џеда може да го задржи домаќинството на Големата награда на Саудиска Арабија најмалку до 2029 година.

Две трки во Саудиска Арабија?

Ако патеката во Кидија навистина биде готова за две години, можно е да остане неупотребена. Претседателот на Саудиската автомобилска федерација, принцот Халид бин Султан Ал-Абдулах Ал-Фајсал, за "The Race" изјави:

„Патеката ќе биде подготвена во 2027 година, но сè зависи од останатите проекти околу неа – дали и тие ќе бидат завршени на време. Кај вакви мега-проекти често доаѓа до доцнење.“

„Не брзаме со заминувањето од Џеда. Ако сè оди добро и ние и Формула 1 бидеме задоволни, тогаш ќе размислуваме за 2028, можеби дури и 2029. Но, следната година ќе имаме појасна слика кога точно ќе можеме да се преселиме.“

Принцот Халид се осврна и на можноста за одржување две трки во Саудиска Арабија, како и потенцијалот за ротирање меѓу двете патеки.

„Прерано е да се зборува за две трки или ротирање помеѓу Кидија и Џеда. Засега сме фокусирани на тоа максимално да го искористиме она што ни останува во Џеда, а потоа да се насочиме кон новиот објект во Кидија и да планираме понатаму кога ќе дојде време. Но за сега, немаме ништо конкретно во план.“

„Во медиумите пред неколку години се спомнуваше можноста за две трки во Саудиска Арабија, но со ваков исполнет календар мислам дека тоа во моментов не е изводливо. Искрено, таа идеја сè уште не сме ја разгледале сериозно“, додаде тој.