За десет години "iPhone" можеби повеќе нема да ви треба

Дали "iPhone" ќе стане минато за десет години? Еди Кју, долгогодишен потпретседател на "Apple", неодамна за време на сведочење на суд даде изјава што привлече големо внимание во технолошкиот свет.

Како што пренесува агенцијата "Bloomberg", Кју во рамки на антимонополската постапка против "Google" изјавил: „Иако ова можеби звучи малку лудо, можно е за десет години да ви не биде потребен "iPhone"'. Тој нагласил дека технолошките промени носат вистинска конкуренција и отвораат нови можности, посочувајќи ја вештачката интелигенција како клучна пресвртница што овозможува влез на нови играчи на пазарот.

Специјализираниот технолошки портал "9to5Mac" оценува дека изјавата на Кју има повеќе шпекулативен карактер отколку што претставува конкретна стратегија на "Apple". Сепак, со оглед на неговата функција во компанијата, оваа изјава не остана незабележана и веќе поттикнува бројни толкувања и предвидувања.

Истиот извор претходно повеќепати информираше дека извршниот директор Тим Кук посветува големо внимание на развојот на "AR" (проширена реалност) очила, кои се гледаат како најперспективен наследник на "iPhone". Иако "Apple" сè уште се соочува со технички предизвици и не е подготвен да претстави производ што целосно ја исполнува таа визија, веќе се работи на т.н. паметна верзија на очилата со вградени камери и микрофони.

Со користење на "Siri" асистентот и визуелна интелигенција, овој уред би можел да биде клучна конкурентска алтернатива на "Apple" во однос на слични производи од компанијата "Meta" – барем додека не се изведе целосен премин кон новата генерација технологии.

"Apple" со ова јасно сигнализира дека размислува за иднина без "iPhone", но засега нема конкретни назнаки кога и дали тоа навистина ќе се случи.