Конгресот на ФИФА во Парагвај, на кој во четвртокот учествуваа делегати од 210 национални асоцијации, првично беше одложен за еден час, но започна со повеќе од два часа доцнење.
Неколку водечки европски фудбалски делегати, вклучувајќи го и претседателот на Европската фудбалска унија (УЕФА), Александар Чеферин, го напуштија 75. Меѓународен конгрес на ФИФА во Парагвај поради доцнењето на претседателот на ФИФА, Џани Инфантино, кој се враќаше од патување на Блискиот Исток со американскиот претседател Доналд Трамп.
„Промена на распоредот во последен момент поради она што се чини дека е прашање на приватна политичка корист не му користи на фудбалот и се чини дека ги става неговите интереси на второ место“, се вели во соопштението на УЕФА.
Конгресот на ФИФА во Парагвај, на кој во четвртокот учествуваа делегати од 210 национални асоцијации, првично беше одложен за еден час, но започна со повеќе од два часа доцнење.
Инфантино ги наведе проблемите со летот како причина за одложувањето, а претседателот на ФИФА ја бранеше важноста на неговото патување во Катар, кој беше домаќин на Светското првенство во 2022 година, и Саудиска Арабија, која ќе биде домаќин на Светското првенство во 2034 година.
„Како претседател на ФИФА, моја одговорност е да донесувам одлуки во најдобар интерес на организацијата. Чувствував дека морам да бидам таму за да го претставувам фудбалот и секој од вас“, рече Инфантино.
Претседателката на Норвешката фудбалска асоцијација, Лиза Клавенес, изјави дека го напуштила Конгресот заедно со „неколку европски колеги“ во првично закажаното време.
-„Ситуацијата е загрижувачка, 210 делегати од целиот свет учествуваат на овој Конгрес, очекувајќи професионално водство и дијалог на највисоко ниво“, рече Клавенес.
Таа додаде дека ја разбира „фрустрацијата и разочарувањето на некои од европските членки на ФИФА“ и дека ќе „обезбеди гласовите на членките да бидат слушнати и почитувани во иднина“.
Неколку часа по заминувањето на Клавенес, УЕФА изрази „длабоко жалење“ поради промената во организацијата на Конгресот, еден од „најважните состаноци во светскиот фудбал“.
Претседателот на УЕФА, Александар Чеферин, го напушти состанокот за време на паузата, заедно со другите европски претставници.
„Сите сме тука да му служиме на фудбалот, од улиците до трибините, а членовите на УЕФА и Советот на ФИФА почувствуваа потреба да нагласат во оваа пригода дека спортот е на прво место“, се вели во соопштението на Европската фудбалска унија.
Инфантино го придружуваше американскиот претседател Доналд Трамп во официјална посета на Блискиот Исток, откако минатата недела ја посети Белата куќа.
САД ќе бидат домаќини на Светското клупско првенство ова лето, додека во 2026 година, заедно со Канада и Мексико, ќе бидат домаќини на Светското првенство.
