Во кинескиот град Хангџоу, во провинцијата Џеџијанг, неодамна се одржа првиот турнир во борење меѓу хуманоидни роботи — "Mecha Fighting Series", во организација на "China Media Group" (CMG), што претставува светско натпреварување на роботи.

На турнирот учествуваа роботи со широк спектар на боречки вештини, вклучително и модели развиени од компанијата "Unitree Robotics". Натпреварувањето беше пренесувано во живо, при што се нагласи технолошката надмоќ на кинеските компании од областа на роботиката.

Историски момент за боречките спортови

Ова натпреварување претставува историски пресврт, бидејќи е првиот спортски настан во светот фокусиран на борби меѓу хуманоидни роботи, илустрирајќи го постепеното вклучување на вештачката интелигенција (AI) во боречките спортови, стои во извештајот на "CMG". Сите учесници биле опремени со технологии развиени во Кина.

Програмата вклучуваше и демонстративни и натпреварувачки мечеви, при што хуманоидните роботи изведуваа реалистични борбени движења, додека човечки оператори ги контролираа во реално време, според организаторите.

Демонстрации и технолошки достигнувања

Компанијата "Unitree Robotics", еден од водечките играчи во индустријата на хуманоидни роботи, беше партнер на настанот. Во текот на турнирот, роботите демонстрираа боксерски вештини во индивидуални и групни борби, при што ги прикажаа своите способности и движења за време на специјална демонстративна сесија, информираше компанијата за "Global Times".

Четири тима човечки оператори управуваа со роботи кои се натпреваруваа во серија боксерски мечеви по елиминациски систем.

„Роботите се борат во колаборативна интеракција меѓу човекот и машината“, изјави Чен Сијун од маркетинг-тимот на "Unitree Robotics" за "Global Times". Според него, роботите изведувале директни удари, аперкати, удари од страна и удари со ротација во воздух, па дури и станувале од подот по пад.

Меѓу учесниците беше и водечкиот хуманоиден робот на компанијата — "Unitree G1", висок 1,32 метри и тежок 35 килограми. Опремен е со напредна компјутерска моќност и прецизна контрола на движењата. Како што посочува Чен, "Unitree G1" е дизајниран за работа во предизвикувачки средини, нудејќи извонредна флексибилност и агилност во компактен формат.