Запознајте го најновото и најсимпатично јапонско возило за еден патник – "MiBot".
"MiBot" е електрично возило за еден патник од јапонската компанија "KG Motors", кое е помало дури и од најкомпактните „кеи“ автомобили, поевтино од многу електрични велосипеди и подготвено да го промени начинот на движење низ градовите.
Со неверојатна цена од само 6.500 евра, овој мал електричен автомобил веќе ја освојува публиката – уште пред фабриката источно од Хирошима воопшто да започне со работа (производството стартува во октомври 2025 година), забележани се над 2.250 нарачки.
Во пренатрупаните јапонски градови, големината е клучна, а "MiBot" тука блеска.
Со должина од само 2.490 мм, овој модел, чиј преден и заден дел изгледаат речиси идентично, е пократок дури и од "Citroen Ami" и доволно мал за да се смести во товарниот простор на комбето "Toyota HiAce".
Основачот на стартап компанијата, Казунари Кусуноки, го создаде за тесните градски улици каде големите автомобили изгледаат како диносауруси изгубени во лавиринт.
Со само едно седиште и без простор за поголем багаж, "MiBot" не е наменет за превоз на товар или долги патувања – тој е совршен за соло возачи и секојдневни градски обврски.
Дометот од 100 км можеби звучи скромно, но е сосема доволен за кратки возења и градски задачи.
Надворешниот дизајн потсетува на носталгичен шарм, додека внатрешноста е чиста функционалност: едно седиште, едноставна контролна табла и компактен екран за навигација и музика.
Тивкиот мотор со моќност од 6,7 коњски сили е поставен назад и овозможува максимална брзина од 60 км/ч. Полнењето на батеријата со капацитет од 7,68 kWh трае околу пет часа на стандардна домашна приклучница.
Со цена од околу еден милион јени (околу 6.500 евра), "MiBot" е повеќе од пристапен за просечниот јапонски купувач.
"KG Motors" сака да го раздрма јапонскиот пазар, кој досега беше прилично скептичен кон електричните возила.
Кусуноки има амбициозна цел – да ги направи електричните автомобили толку евтини и практични што никој не би можел да им каже „не“. Планира да произведе 3.300 единици до март 2027 година, а потоа и 10.000 годишно.
Иако јапонскиот пазар заостанува зад Европа и Кина, а загриженоста за досегот и мрежата на полначи сè уште постои, "MiBot" нуди точно она што е потребно за градскиот живот.
Ако "KG Motors" успее, "MiBot" може да ја промени дефиницијата за електрично возило – не како луксузен, скап гаџет, туку како едноставна и достапна алатка за секојдневието.
