Најновата авантура на Орландо Блум можеби звучи како дел од некој фантастичен филм, но сепак е вистинска. Имено, актерот реши да го проба третманот за прочистување на крвта од микропластика.
Тој објави фотографија на која изгледаше многу опуштено додека беше прицврстен на машина за која се тврди дека отстранува микропластика од крвта. Лондонската клиника, која нуди двочасовен третман од 10.000 фунти, беше пофалена од 48-годишниот актер за успешно исфрлање на „токсични хемикалии“ од своето тело.
Сепак, научниците изразија скептицизам во врска со тврдењата на клиниката за постапката – доведувајќи во прашање недостатокот на „сигурни докази“ за нејзините придобивки и цена.
За време на третманот, крвта се зема и се одделува на црвени крвни зрнца и плазма. Оваа плазма, според Дејвид Коен, пронаоѓачот на постапката, потоа се чисти со машина од „вечни хемикалии, микропластика, воспаленија, отрови и токсини“ пред да се измеша со црвени крвни зрнца и да се врати во телото, пишува „Дејли мејл“.
Се вели дека клиниките „Кларифај“ се првите во светот што нудат услуга наречена „Клари“. Тие тврдат дека отстрануваат помеѓу 90 и 99 проценти од микропластиката од крвта. Менаџерите на клиниките велат дека постапката – која не е покриена од НХС – го намалува воспалението во телото, кое е поврзано со рак и невролошки нарушувања.
Научниците откриле микропластика, која се дефинира како парчиња пластика помали од 5 мм, во човечката крв, органи, па дури и во мозокот. Но, има малку докази за убедливо да се докаже дали овие честички директно му штетат на телото или дали нивното филтрирање ќе обезбеди здравствени придобивки.
Емеритус професорот Едзард Ернст од Универзитетот во Ексетер рече: „Не сум запознаен со никакви сигурни докази што покажуваат дека постапката има некои од наводните ефекти врз здравјето на луѓето. Не сум ни сигурен дека отстранува нешто од пациентот освен многу пари.“
Д-р Мусуми Мукерџи претходно ја доведе во прашање вредноста на третманот. Таа рече: „Кое е нивното оправдување за 10.000 фунти ако станува збор за работа од два часа? Во општата пракса и во поголемиот дел од НХС, би сакале докази. Секоја постапка има можни несакани ефекти. Се надевам дека направиле студии за тоа и додека не ги видам тие докази, не би им советувал на ниту еден од моите пациенти да го прават тоа.“
Запрашан да одговори на обвинувањето дека третманот е скап трик, г-дин Коен рече: „Би рекол дека треба да ги разгледаат истражувањата и резултатите што луѓето ги гледаат во болницата и резултатите што ние ги гледаме во болницата и во клиниката.“
Џаел Коен, извршен директор на клиниката „Кларифај“, рече дека постапката е „безбеден, ефикасен метод што помага во чистењето на телото од штетни токсини и микропластика што сите ги акумулираме.“
