Тренерот на Пари Сен Жермен, Луис Енрике, уште еднаш докажа дека е еден од најдобрите фудбалски стратези на планетата – се наоѓа на чекор од освојување на Европа и светот во временски период нешто подолг од еден месец.
Неговиот ПСЖ во полуфиналето на Светското клупско првенство го понижи Реал Мадрид со убедливи 4:0 и закажа големо финале против Челзи во недела од 21:00 часот.
Повторно кобен за противникот беше Усман Дембеле, кој оваа сезона е најдобар играч на ПСЖ – постигна гол против Реал, а претходно и против Баерн во четвртфиналето, иако неодамна се врати по повреда.
Голот против Реал беше негов 35-ти во сезоната, а покрај тоа има и 16 асистенции на вкупно 52 натпревари.
Круна на сезоната ќе биде финалето на Светското првенство, каде што Дембеле може да го заокружи историскиот успех со светска титула, надополнета со Купот и Суперкупот на Франција, Лигата на шампионите и титулата светски шампион.
Со ваква статистика, речиси е сигурно дека токму тој е главниот фаворит за „Златната топка“, иако медиумите можеби повеќе го истакнуваат некој друг, како Ламин Јамал, чудото од Барселона.
Луис Енрике во изјава веднаш по натпреварот на теренот рече дека за него Дембеле е најдобар фудбалер на светот, а на прес-конференцијата појасни зошто токму Французинот треба да ја добие „Златната топка“:
„За да ја освоите Златната топка, мора да постигнувате голови, да запишувате асистенции и да носите трофеи на својот тим. Ако постои еден играч кој го направил сето тоа, тоа е Усман Дембеле. Според мене, тој е далеку над останатите играчи“, изјави Луис Енрике по натпреварот.
