Снимка која прикажува необична средба меѓу алигатор и неколку ајкули во водите кај Јужна Каролина стана вирална на социјалните мрежи.
Видеото го снимила туристката Џина Атанс од Чикаго, која била на одмор во Јужна Каролина и ручала со своите родители во ресторан во местото Хилтон Хед.
„Јас и моето семејство седнавме да нарачаме пијалаци кога еден од менаџерите нѝ пристапи и нѝ рече дека има ајкули и алигатор во близина на пристаништето“, рече Атанс во интервју за локалните медиуми. „Мојата прва помисла беше: Невозможно е тие да бидат заедно во водата“, додаде таа.
Средбата траела само неколку секунди, но бројни гости на популарниот ресторан ја снимиле.
По средбата, водните ѕверки се разделиле мирно, пишува Фокс њуз.
Средбите со алигатори се вообичаени во Јужна Каролина, каде што нивната популација се проценува на околу 100.000, според Министерството за природни ресурси на државата.
Овие влекачи најчесто живеат во слатководни и малку солени води, т.е. во реки и мочуришта.
Помали видови ајкули пливаат во естуарите околу Јужна Каролина, особено при плима.
Во крајбрежната заедница редовно може да се видат различни диви животни – од орли до делфини и морски желки.
Експертите за див свет им советуваат на жителите и посетителите никогаш да не ги хранат животните и да останат што е можно подалеку за да не предизвикаат напад.
