„Vision-X Compact“ се издвојува со целосно затворена маска на ладилникот и светлечко лого на "Mazda". Напред се забележуваат мали предни светла, „дигитални“ странични ретровизори (камери наместо огледала) и чисти, протегнати линии на каросеријата.

Иако компанијата не откри многу технички детали, видливо е дека концептот има црни пластични обложувања и аеродинамично оптимизирани тркала.

Во очи паѓа и панорамски стаклен покрив, како и целосно заоблен заден дел.

Должината на возилото изнесува 3.825 мм, ширината 1.795 мм, а висината 1.470 мм, со меѓуоскино растојание од 2.515 мм.

Тоа значи дека автомобилот е пократок за 255 мм од „Mazda2“ и има за 55 мм пократко меѓуоскино растојание.

Минимализам и технологија

Минималистичкиот дизајн продолжува и во внатрешноста, каде што се забележува волан со израмнет долен дел и кружен дигитален инструмент-кластер.

Интересно е што концептот нема инфотејнмент-екран – според „Mazda“, возачот би го користел сопствениот паметен телефон наместо тоа.

Кога станува збор за технологијата, „Mazda“ замислува дека овој концепт ќе поседува „емпатична“ вештачка интелигенција која ќе функционира како сопатник.

Компанијата наведува дека тоа би овозможило создавање „емоционална врска со автомобилот, слична на искрено пријателство“.

Иако ова звучи како научна фантастика, „Mazda“ тврди дека активно работи на развој на систем кој ќе создаде „автентична поврзаност меѓу човекот и возилото“.

Вештачката интелигенција би можела да разговара со возачот и, на пример, да каже:

„Убаво се вклучи во сообраќајот,“ или „Се сеќаваш ли на оној кафе-бар за кој зборуваше минатата недела? Постои интересен пат што води до него.“

„AI“ исто така би можела да учи и да го „чита“ расположението на возачот, па во зависност од моментот би пуштала соодветна плејлиста — или едноставно би молчела кога возачот не сака разговор.