Сметајќи дека таквиот пристап е непочитување кон кандидатите, тој решил да ја повлече својата апликација — што поттикна широка расправа за улогата на AI технологијата во процесот на вработување, пишува „BBC“.

„Не ми се допадна тоа, па им реков дека ако интервјуто во живо не е вредно за нивното време, тогаш ниту позицијата не е вредна за моето, и се откажав“, изјави Стот.

„Се чувствував како да не ме почитуваат“

Стот ја споделил својата загриженост на социјалните мрежи, каде, како што вели, добил „едногласна поддршка“ од луѓе кои се согласуваат дека AI интервјуата „не се добра идеја“. „Се чувствував непочитувано што немаа желба да издвојат време за разговор со кандидатите“, додаде тој. „Кога влегувате во компанија или тим, личноста е важна и тоа не може да се квантифицира со податоци, па изгледа контраинтуитивно AI да го елиминира тој аспект“.

Сепак, Стот нагласува дека AI „може да биде фантастичен“ ако се користи за соодветни задачи, како преземање напорни работни процеси. „Не може секој да одбие интервју за работа, но ако користат AI и доволно од нас кажат 'не', тогаш тоа нема да се прифати“, заклучи тој.

Експерти: Човечкиот елемент е незаменлив

Лук Ботомли, директор на компанијата за вработување „James Ray Recruitment“, изјавил дека вештачката интелигенција станува „сѐ поважна“ во бизнисот. „Мислам дека AI ќе биде нешто што мора да се интегрира во работењето, инаку ќе заостанете. Во моментов тоа е еднонасочен воз и сите мора да го следат“, вели Ботомли, но додава: „Сепак, кога станува збор за човечкиот елемент — мислам дека тој не може да се замени“.

Тој објаснил дека користењето AI во процесот на селекција може да значи дека компаниите ќе „пропуштат потенцијално извонредни кандидати“. „Интервјуто лице в лице овозможува да го запознаете поединецот и да разберете што може да донесе во улогата — тоа не може да го добиете преку робот“, истакнал тој.

Со тоа се согласува и Хајфа Мохдзaини, виша советничка за технологија во „CIPD“, професионално тело за човечки ресурси. „Работодавците мора да ја најдат вистинската рамнотежа помеѓу AI и човечката интеракција при вработување и да ги земат предвид преференциите на кандидатите, за да не изгубат талентирани луѓе“, изјавила таа.

Таа нагласила дека, иако четбот може да биде исплатлив, би можел да одбие одредени кандидати. „Работодавците треба однапред да ги информираат кандидатите кога ќе користат AI и да објаснат како тоа ќе им користи“, советувала таа.