Хемикалија пронајдена во темната чоколада би можела да помогне во забавување на стареењето, сугерираат научниците.

Студијата ги проучувала нивоата на теобромин – соединение што се наоѓа во какаото – во крвта и ги споредила со маркерите на биолошко стареење, кои покажуваат колку е старо телото во смисла на здравје и функции, а не според бројот на години.

Иако експертите не би им советувале на луѓето да јадат повеќе чоколада, велат дека наодите би можеле да помогнат во откривање на секојдневни намирници што содржат траги од поздрав и подолг живот.

Теоброминот е релативно слабо истражен прехранбен фитонутриент кој е поврзан со здравствени придобивки и подолг животен век, велат научниците, пренесува агенцијата „dpa“.

Сепак, досега е спроведено ограничено истражување за неговото влијание врз луѓето.

Анализата, која ја спровеле експерти од „King’s College“ во Лондон, опфатила 509 луѓе во Британија и 1.160 лица од студијата „Kora“ во Германија.

Научниците соопштија дека пронашле „значајна поврзаност“ меѓу нивото на теобромин во крвта и побавното биолошко стареење.

Многу возбудливо откритие

Водечкиот научник од „King’s College“ во Лондон, Рами Саад, кој воедно е и доктор по клиничка генетика, изјави:

„Ова е многу возбудливо откритие, а следните важни прашања се што стои зад оваа поврзаност и како можеме понатаму да ги истражиме интеракциите меѓу прехранбените метаболити и нашиот епигеном. Овој пристап би можел да нè доведе до важни откритија за стареењето, а пошироко и за честите и ретките болести.“

Јордана Бел, професорка по епигеномика на „King’s College“ во Лондон, изјави:

„Нашата студија открива врски меѓу клучна компонента на темната чоколада и подолгото задржување на младоста. Иако не велиме дека луѓето треба да јадат повеќе темна чоколада, ова истражување може да ни помогне да разбереме како секојдневната храна може да содржи траги за поздрав и подолг живот.“

Научниците тестирале и други молекули пронајдени во какаото и кафето, но сугерираат дека ефектот е специфичен за теоброминот.

Тимот сега истражува дали влијанието врз биолошкото стареење е единствено за теоброминот или дали ова соединение стапува во интеракција со други хемикалии во темната чоколада, како што се полифенолите.

Полифенолите се силни антиоксиданси кои се наоѓаат и во овошјето, зеленчукот, чајот, кафето и виното.