Исхраната и вежбањето се поврзани со подобар квалитет на спермата

Според анализаta објавена во научното списание „Хјуман репродакшн апдејт“ (Human Reproduction Update), мажите кои губеле на тежината со помош на промените во животниот стил, односно правилна исхрана и редовно вежбање, покажале подобрувања во квалитетот на спермата – дури и кога губењето на килограмите било умерено.

Истражувачите забележале подобрувања во подвижноста и обликот на сперматозоидите, кои се важни фактори за машката плодност.

Операцијата за намалување на желудникот не ги донесе очекуваните резултати

Од друга страна, мажите кои се одлучиле за баријатриска хирургија, иако брзо и значително ослабеле, не постигнале видливи подобрувања во квалитетот на спермата.

Водачот на истражувањето Ендру Пил од Универзитетот во Аделаида истакнал дека позитивните ефекти врз плодноста почесто се поврзани со оптимизирањето на исхраната и физичката активност отколку со самото драстично губење на килограмите.

Дебелината има негативно влијание, но репродуктивниот успех може да зависи повеќе од квалитетот на исхраната и редовното движење отколку од големото намалување на телесната маса, објаснува Пил.

Ако се обидувате да ослабете за да ја подобрите вашата плодност, новата научна анализа покажува дека не е важно само колку тежина губите, туку и како го правите тоа.

Хируршкото слабеење може привремено да ѝ наштети на плодноста

Научниците предупредуваат и на тоа дека операцијата за слабеење може да има краткорочни негативни ефекти врз плодноста, веројатно поради нутритивните недостатоци или хормоналните нарушувања што настануваат како резултат на наглото губење на килограмите.

Што е со лековите за слабеење?

Податоците за лековите за слабеење засега се ограничени. Анализираните студии главно се однесуваат на лекови за дијабетес како што се „метформин“ и „лираглутид“, додека за поновите лекови сè уште нема доволно информации.

Научничката Никол Мекферсон нагласува дека се потребни итни истражувања за ефектот на популарните лекови како што е „семаглутид“ врз машката плодност, особено со оглед на нивната зголемена употреба.

Дебелината и пад на плодноста – растечки проблем

Претходните истражувања покажуваат дека стапките на неплодност кај мажите со прекумерна телесна тежина и до 50 отсто се повисоки во споредба со мажите со нормална телесна тежина, со чести оштетувања на основните параметри на спермата.

Во време кога дебелината се смета за глобална епидемија, а нивоата на плодност достигнуваат историски ниски вредности, експертите предупредуваат на огромен недостаток на знаење за тоа кој е најдобриот пристап за мажите кои сакаат да ја подобрат својата плодност пред зачнувањето.

Заклучокот е јасен – ако сакате да ги зголемите шансите за татковство, фокусот на здравата исхрана, редовното вежбање и одржливите животни навики би можеле да биде поделотворни од брзите и радикални решенија.