Амал Клуни, угледна адвокатка специјализирана за човекови права и сопруга на холивудскиот актер Џорџ Клуни, е меѓу најзабележаните личности на црвениот тепих во секоја прилика, а во тоа значајно ѝ помага и нејзината заводлива коса.

Либанско-британската правничка со години носи долга, права фризура и ретко експериментира со должината. Најчесто ги менува нијансите и додава слоеви, но едно секогаш е сигурно: нејзината коса е совршена.

Кој шампон го користи Амал Клуни?

Тајната, секако, е во правилната нега на косата, а во случајот на Амал Клуни за тоа е задолжен Димитрис Џанетос, фризер кој соработува со бројни ѕвезди, како Џиџи Хадид и Меган Фокс.

Како што објасни еднаш, една од најдобрите работи што можете да ѝ ги пружите на вашата коса за да биде беспрекорна е користењето детокс шампон.

„Детокс шампонот ги отстранува сите производи за стилизирање што се задржале на влакното и му го одземаат сјајот“, изјавил тој во една прилика за британскиот „Vogue“.

Фармацевтката и експертка за коса Хелена Родеро во својата книга „Сѐ за вашата коса и кожа“ ги истакнува бројните предности на детокс шампонот и наведува дека тој е идеален за лето, кога косата е изложена на хлор од базени или на сол и тврда вода.

Детокс шампон во текот на зимата

Во зимските месеци, покрај остатоците од пена, лак и други производи за обликување, косата дополнително се оптоварува и со загадување од воздухот. Тука се и минералите од тврда вода и други нечистотии, па редовната употреба на детокс шампон е многу важна за косата навистина да биде чиста и сјајна.

Како се користи детокс шампон?

Се препорачува детокс шампонот да се користи еднаш до двапати месечно, но не почесто, бидејќи секојдневната употреба може да доведе до претерано сушење на влакното.

Исто така, по испирањето задолжително нанесете хидратантен регенератор или маска за коса, за таа да остане мека и хидрирана.

Како да изберете детокс шампон?

Кога ќе дојде ред на купување детокс шампон, тука настанува проблем, бидејќи, прво, понудата е огромна и второ, производителите понекогаш различни производи ги нарекуваат детокс шампон.

Клучно е да се пронајде оној што ги отстранува металите од косата без да ја менува бојата, како и да се внимава на тоа на кој тип ѝ припаѓа вашата коса.

- За масна коса на која се наталожуваат остатоци од производи за стилизирање, најдобро е да се пронајде формулација со активен јаглен, за полесно да се извлечат сите нечистотии и да се отстрани вишокот маснотија.

- За коса со наталожени минерали од тврда вода, најдобар избор е хелатен шампон, кој ги отстранува разните штетни супстанции од хемиски процеси, хлорот од базени, тврдата вода и загадувањето... Сето тоа придонесува косата да изгледа безживотно, а кај русокосите што пливаат во базен може да доведе и до појава на зеленикава нијанса при контакт со хлорот.

- Доколку косата ви е оштетена или фарбана, треба да побарате благи, хидрирачки формули со алое вера или антиоксиданси, како екстракт од рузмарин или мајчина душица, за да се ревитализира и заштити.

- Ако забележувате дека скалпот ви е сув и се појавува првут, најдобро е да изберете шампони со антисептични својства, како масло од чајно дрво и хамамелис, за чистење и смирувачки ефект.