Нејзиниот ослободен и често сексуализиран имиџ беше дел од растечкиот „нов бран“ на француската кинематографија, и иако нема глумено во филм од 1973 година, нејзиното наследство е непобитно, пишува „Хелоу“.

Иконата на француското актерство и активистка ќе остане запаметена по нејзината бурна романтична историја, исто колку и по нејзината филмографија.

Во текот на децениите на нејзината кариера, особено во нејзините рани филмски години, Брижит имаше неколку култни љубовни афери со колеги и луѓе зад сцената, а се мажеше четирипати.

Прошетајте низ спомените и потсетете се на нејзиниот љубовен живот, од многуте краткотрајни приказни до нејзините судбоносни „да“…

Првиот сопруг – Роже Вадим

Во 1952 година, на 18-годишна возраст, Брижит се омажи за режисерот Роже Вадим, кој беше шест години постар од неа. Ова беше со години пред тој да изгради репутација поради неговите врски со млади и убави актерки (како Џејн Фонда). Се разделија во 1956 година, а се разведоа во 1957, но останаа добри пријатели и соработуваа и во годините што следуваа.

Жан-Луи Трентињан

Таа започна афера со колегата од филмот „И Бог ја создаде жената“, Жан-Луи Трентињан во 1956 година, што придонесе за распадот на нејзиниот брак. Жан-Луи во тоа време исто така беше оженет со актерката Стефан Одран, но таа се разведе од него подоцна истата година. Актерите живееја заедно две години, но врската не опстана, особено поради тоа што Брижит започна друга афера со музичарот Жилбер Беко. Таа и Жан-Луи раскинаа во 1958 година, што доведе до краток депресивен период за актерката.

Вториот сопруг – Жак Шарие

Брижит брзо се опорави и најде љубов со актерот Жак Шарие, нејзиниот колега од „Бабет оди во војна“. Започнаа бурна романса и се венчаа во 1959 година, а само седум месеци подоцна добија син, иако Брижит во тогашните интервјуа призна дека можноста да биде мајка не ја возбудува многу.

Развод и Глен Форд

Во 1962 година, Брижит и Жак го објавија својот развод, делумно поради аферата на актерката со холивудската ѕвезда Глен Форд. Нивниот син Николас-Жак Шарие главно го одгледуваше татко му, имајќи малку контакт со својата биолошка мајка сè додека не стана возрасен. Потоа, таа продолжи со својата актерска кариера со полна пареа, веќе како огромна ѕвезда, и накратко живееше со музичарот Боб Загури помеѓу 1963 и 1965 година.

Третиот сопруг – Гинтер Сакс

Нејзиниот трет брак се случи во 1966 година со германскиот милионер Гинтер Сакс, кој ја освои прелетувајќи со хеликоптер над нејзината вила на француската ривиера и фрлајќи стотици рози врз нејзиниот дом. Сепак, се известуваше дека таа започнала афера со пејачот Мајк Сарн само неколку дена по венчавката. Нивниот брак исто така не траеше долго – се разделија во 1968, а се разведоа во 1969 година. Во 1968 година таа започна врска со актерот Патрик Жил, која заврши во 1971 година.

Серж Генсбур и други романси

Во текот на следните две децении, Брижит имаше неколку значајни романси, вклучувајќи ги оние со пејачот Серж Генсбур, шанкер и инструктор по скијање Кристијан Калт, писателот Џон Гилмор, актерот Ворен Бити и други. Нејзините најдолги врски во тој период беа со скулпторот и актер Мирослав Брозек, помеѓу 1975 и 1979 година (за кого дури позираше за скулптури), и францускиот телевизиски продуцент Ален Бугрен-Дубур, помеѓу 1980 и 1985 година.

Четвртиот сопруг – Бернар д’Ормал

Во јули 1992 година, Брижит го запозна Бернар д’Ормал, бизнисмен и советник на Жан-Мари Ле Пен, поранешниот лидер на екстремно десничарската француска партија „Национален собир“. Веќе следниот месец тие се венчаа. Нивниот брак ја инспирираше Брижит во тоа време да го поправи односот со својот син, а нејзината заедница со Бернар остана стабилна до ден-денес. Нивниот брак трае подолго од нејзините претходни три заедно.

Зошто толку многу афери?

Во својата книга „Larmes de combat“ (Солзи од борба), Брижит искрено зборуваше за тоа зошто имала толку многу афери и краткотрајни врски: „Со секоја врска, постојано се враќав во потрага по друга љубов кога сегашната ќе станеше млака. Не го сакам она ‘помеѓу’, она што е помалку добро. Секогаш барав страст. Затоа честопати бев неверна. А кога страста ќе дојдеше до својот крај, јас си ги пакував куферите.“