По добивањето на признанието на наградите од критичарите „Critics Choice Awards“, водителот Џими Кимел се осврна на најзначајните успеси што неговата емисија „Џими Кимел во живо“ (Jimmy Kimmel Live!) ги оствари во изминатата година.
Кимел потсети и на предизвиците со кои се соочи емисијата во последните месеци, меѓу кои и шестдневната суспензија од програмата. Тој призна дека целиот настан за него бил исклучително тежок.
„За мене тоа беше искуство слично на смрт. Кога се случи сето тоа, се чувствував како Том Соер и Хаклбери Фин кои ја гледаат сопствената погребна церемонија“, изјави Кимел, алудирајќи на укинувањето на емисијата во септември поради неговите коментари поврзани со смртта на Чарли Кирк.
Водителот додаде дека и понатаму се соочува со критики од Доналд Трамп, кој во повеќе наврати јавно повикувал на укинување на неговата емисија.
По победата на „Critics Choice Awards“, Кимел истакна дека поддршката од публиката му значи многу.
„Да се биде тука и да се види дека луѓето позитивно реагираа на емисијата е голема чест. Ви благодарам на сите што нè поддржавте и што нè потсетивте дека слободата на говор не треба да ја земаме здраво за готово – ниту во овој град, ниту во оваа земја“, рече тој.
Во својот говор, Кимел не пропушти да го спомне и Трамп, на препознатлив саркастичен начин.
„Најмногу од сè сакам да му се заблагодарам на Доналд Џенифер Трамп. Ви благодарам, господине претседателе, за сите смешни работи што ги правите секој ден. Имавме неколку возбудливи недели и со нетрпение очекуваме да се вратиме во етер утре навечер за да зборуваме за нив“, изјави Кимел.
Тој потсети и дека за Божиќ јавно го изразил своето противење кон Трамп, тврдејќи дека укинувањето на емисијата се случило затоа што не покажувал восхит кон него.
„Американската влада ми се закануваше, како и на компанијата за која работам, и одеднаш исчезнавме од програмата“, изјави Кимел.
