Дали некогаш сте посакале да ги спакувате куферите и да се преселите на бајковито место покрај море? За некого тоа можеби звучи како далечен сон, но благодарение на иницијатива од малиот грчки остров Антикитера, тоа навистина би можело да стане реалност за многумина што посакуваат голема животна промена. Сместен во Егејското Море, меѓу Крит и Пелопонез, овој прекрасен остров ширум ги отвора вратите за семејства и квалификувани работници, нудејќи бесплатна храна, сместување и месечен паричен надомест.
Во обид да го зголеми сè помалиот број жители, Грција на новите доселеници на Антикитера им исплаќа по 500 евра месечно во период од три години по доселувањето. Тоа вкупно изнесува 18.000 евра. Островот нуди мирен, рурален начин на живот, со воодушевувачки плажи и пријатна грчка клима. „Антикитера во моментов има само 45 постојани жители, па станува збор за тивка и блиско поврзана заедница“, вели Вејн Милс, раководител на операции во меѓународната логистичка компанија „Seven Seas Worldwide“. „Особено сакаат да привлечат млади семејства за да го оживеат островот и да ја вратат младешката енергија, така што без сомнение ќе бидете исклучително добредојдени веднаш по пристигнувањето!“
Како одговор на падот на населението и одливот на мозоци, бројни земји нудат поттикнувачки мерки за да привлечат нови жители во одредени региони. Повеќето жители на Антикитера се постари од 50 години, а деца има многу малку. Според „Elxis“, грчки провајдер на услуги од областа на недвижности и правни совети, програмата ја организирала Грчката православна црква на Китира, која административно ја опфаќа и Антикитера, со цел да привлече пекари, рибари и семејства со деца.
Пет семејства имаат шанса за живот на бајковитиот остров
Програмата е наменета за вкупно пет семејства, а кандидатите пред доделувањето на финансискиот поттик ќе поминат интервју. Сепак, постои и „квака“. Иако семејствата што сакаат да се преселат на островот ќе можат да изберат нова куќа, објектите сè уште не се изградени поради доцнење во административните постапки. Поради тоа, Антикитера досега нема примено ниту едно семејство преку оваа програма. За новости околу напредокот на градбата, заинтересираните се советуваат да стапат во контакт со Туристичката канцеларија на Китира, пренесува „Mirror“.
Малиот остров е достапен со траект од блискиот остров Китира или од пристаништето Кисамос на Крит. Антикитера, со својата малобројна популација и изолираната положба, нуди автентично искуство на традиционален живот на грчки остров. Во текот на зимските месеци има само една мала продавница со основни прехранбени производи и зеленчук. Сепак, островот има електрична енергија и пристап до интернет.
Антикитера е позната по Антикитерскиот механизам — древен грчки аналоген компјутер што потекнува приближно од периодот меѓу 150 и 100 година пред нашата ера. Овој уред служел за предвидување на астрономски положби, затемнувања и други небесни појави. Откриен е во 1901 година во бродолом крај брегот на островот и се смета за еден од најважните технолошки артефакти од античкото доба. Бродоломот кај Антикитера (околу 70 – 60 пр. н.е.) се вбројува меѓу најбогатите антички бродоломи некогаш откриени, преполн со артефакти како статуи, монети и луксузни предмети. Островот е познат и по својата недопрена природа и богат животински свет. Антикитера е важно одморалиште за птиците преселници на нивниот пат меѓу Европа и Африка, што го прави вистински рај за набљудувачите на птици.
