Хуманоидните роботи веќе подолго време не се само научна фантастика, а според неодамнешни објави од кинески и американски компании кои планираат нивно масовно производство, тие се доближуваат и до реална практична примена. Експертите истакнуваат дека комбинацијата од поевтини компоненти, батерии со поголема густина и напредна вештачка интелигенција значително ги забрзала способностите на хуманоидните роботи во последните пет години.

Прва масовна испорака

Кинеската компанија „UBTECH“ тврди дека минатиот ноември ја реализирала првата масовна испорака на хуманоидни роботи во светот. Повеќе од 1.000 единици од моделот „Walker S2“ биле распределени во фабрики во 2025 година, вели Ју Женг, заменик-декан на истражувачкиот институт на „UBTECH“ во Шенжен, пренесува „Nature“. Нивните сребрено-бели хуманоидни роботи можат автономно да одат, да фаќаат предмети и стабилно да функционираат, но нивната примена во индустријата сè уште е во рана фаза, додава Женг.

Нивната практична корист сè уште не е целосно јасна. Ограниченото траење на батеријата и постојаната зависност од човечки оператори значи дека роботите често функционираат како далечински управувани асистенти, додека со својата работа собираат податоци за развој и производство на идни модели.

„Тие можат да извршуваат можеби една или две задачи автономно или полуавтономно. Но не можат да реагираат на реални проблеми како нашите човечки мозоци“, вели за „Nature“ Есијн Чу, експерт за роботика на Универзитетот „Cardiff Metropolitan“ во Велика Британија, кој надгледува тестирање на повеќе од 80 роботи во услужни и здравствени средини.

Тековен фокус – автомобилската индустрија

Роботската индустрија е фасцинирана од хуманоидната форма на роботите, и покрај нивната вродена нестабилност во споредба со четириножни или статични индустриски роботи. Оскар Палинко од Универзитетот на Јужна Данска во Оденсе за „Nature“ забележува дека хуманоидниот робот ќе падне ако ја изгуби енергијата. Сепак, способноста на хуманоидните роботи да се движат во средини создадени за луѓе може да ги направи исклучително разновидни алатки. Подобрените актуатори, алгоритмите за учење и генеративните модели им овозможуваат на роботите да „размислуваат“ и да учат задачи за кои претходно не биле програмирани, со што технологијата се доближува до идеалот.

Нивната рана примена е насочена кон автомобилската индустрија. Американски компании, меѓу кои „Boston Dynamics“ и „Tesla“, спроведуваат пилот-тестирања на хуманоидни роботи во своите фабрики, каде што задачите се полуструктурирани, но разновидни. Каролина Парада, раководителка на роботскиот тим на „Google DeepMind“ во Болдер, Колорадо, за „Nature“ вели дека таквите средини се идеални за хуманоидни роботи.

Процесот на учење

Компаниите што користат хуманоидни роботи очекуваат тие да учат за време на работата. Кога „UBTECH Walker S2“ ќе закаже при автономна задача, далечински оператор ја довршува работата, овозможувајќи собирање податоци за подобрување на идните перформанси. „UBTECH“ и „Boston Dynamics“ го користат истиот пристап во големи центри за собирање податоци, каде што луѓе далечински управуваат со хуманоидни роботи за да ги обучуваат за различни задачи.

Кина е особено отворена за оваа технологија. Фабриките ѝ дозволуваат на „UBTECH“ обемни тестирања на нивните роботи. „Во моментов ефикасноста и продуктивноста на хуманоидниот робот можеби не можат да се споредат со човечки работник и нашите клиенти тоа добро го знаат. Тие го гледаат ова како почеток“, изјавува портпарол на „UBTECH“ за „Nature“. Со оглед на тоа што вештачката интелигенција сега е приоритет на кинеската влада и дека постои обемен индустриски синџир на снабдување, Кина може брзо да напредува во развојот на хуманоидни роботи, коментира за „Nature“ Серена Ивалди од центарот „Inria“ при Универзитетот Лорен во Франција.

Безбедносни и етички прашања

Сепак, безбедносните прашања и понатаму остануваат. Ивалди предупредува дека батериите со висока енергетска густина можат да се запалат и дека неструктурираните средини се опасни. Планираните примени вклучуваат опасни задачи, работа со клиенти во супермаркети и хотели, како и инспекции на гранични премини.

„Една од моите најголеми грижи е дека целата оваа технологија би можела да се користи за воени цели. Тоа е нешто поради кое се будам ноќе“, предупредува на крајот Палинко, нагласувајќи ги и сериозните етички дилеми.