Од само 500 во светот – два примероци во Македонија: Ducati ја претстави ексклузивната Scrambler 10th Anniversario Rizoma Edition
Произведен во само 500 нумерирани примероци на глобално ниво, Ducati Scrambler 10th Anniversario Rizoma Edition претставува вистинска колекционерска реткост. Моделот првпат беше претставен во октомври 2024 година, а од ексклузивната серија, два примероци се наоѓаат во Македонија.
Луксузниот мото-бренд Ducati ја одбележа 10-годишнината од раѓањето на Scrambler линијата со претставување на специјалното издание Scrambler 10th Anniversario Rizoma Edition.
Мотоциклот за првпат беше официјално претставен во октомври 2024 година, како дел од јубилејната програма на брендот, а денес важи за еден од најексклузивните Scrambler модели некогаш произведени.
Ducati Scrambler 10th Anniversario Rizoma Edition се нуди по цена од 15.500 евра и е произведен во строго ограничена, нумерирана серија од само 500 примероци во светот, што го прави вистинска колекционерска инвестиција.
Она што овој модел го прави уште посебен е фактот што е создаден во соработка со долгогодишниот партнер Rizoma, кој за првпат директно учествуваше во обликувањето на сериски Ducati мотоцикл, задржувајќи ја филозофијата Land of Joy.
Секој детаљ е внимателно осмислен – од препознатливата Metal Rose завршница, до прецизно избалансираната комбинација на Stone White и црна боја, кои создаваат елегантен и впечатлив визуелен идентитет.
Под „кожата“, Ducati Scrambler 10th Anniversario Rizoma Edition е придвижуван од 803-кубен L-twin мотор кој развива 73 коњски сили, со современи технологии кои обезбедуваат врвно уживање и безбедност при возење.
Ексклузивноста на овој Ducati модел дополнително се нагласува со фактот што Македонија има два примероци од ова јубилејно издание, што ја вбројува земјава меѓу ретките пазари со ваква колекционерска реткост.
