Колку во просек чини вечера за двајца ширум Европа: Македонија една од државите со најниски цени
Онлајн платформата за патувања „FerryGoGo“ сподели анализа на цените за вечера од три јадења во Европа. Додека Македонија е меѓу најевтините, Косово е на дното, а земјата каде што ќе платите најмногу за оброк е Швајцарија.
Во Европа, истата вечера за двајца може да чини од 20 до 107,24 евра според „FerryGoGo“.
Страницата ги анализира трошоците за одмор секоја година, од цените на фериботите и буџетите за патување со автомобил до секојдневните трошоци што брзо се собираат откако ќе пристигнете на вашата дестинација.
Вечерата во ресторан е еден од најдобрите показатели за разбирање на целокупното ниво на цените на една дестинација. Ако оброк од три јадења во ресторан од средна класа е скап, веројатно ќе бидат скапи и кафето, пијалаците, а честопати и сместувањето.
За своите пресметки тие ја користеле просечната цена на вечера од три јадења за двајца во ресторан од средна класа, без пијалаците.
Швајцарија е на врвот на листата, со просечна вечера од три јадења за двајца што чини 107,24 евра. По неа следат Данска (93,69 евра), Луксембург (90 евра) и Норвешка (89,86 евра).
Петтото место го делат Холандија, Ирска, Финска и Белгија со 80 евра.
Косово е најевтината дестинација каде што вечерата за двајца чини просечно 20 евра, по што следуваат Македонија (24,38 евра), Молдавија (30,32 евра) и Босна и Херцеговина со 30,75 евра.
Тие ги издвоија и земјите што нудат најдобра вредност за целокупното искуство, а тоа се Португалија, Шпанија, Грција, Албанија и Црна Гора.
