Станува збор за калинка – овошје што се цени уште од дамнина, а денес знаеме дека е богато со антиоксиданси. Научниците сега истражуваат дали соединението што се наоѓа во јадливиот дел од калинката и нејзината кора може да има антивирусно дејство кое би можело да го забави ширењето на вирусот на грип.

Што вели науката?

Студија спроведена во Иран го испитувала ефектот на пуникалагин, соединение присутно во калинката, во лабораториски тестови на клетки. Истражувачите откриле дека пуникалагинот го попречува процесот на хемаглутинација, односно слепување на црвените крвни клетки, што е клучно за начинот на кој вирусот на грип навлегува во човечките клетки, пишува „New York Post“.

Авторите наведуваат дека пуникалагинот во лабораториски услови покажал ефект против вирусот на грип. Сепак, истражувањата за неговото влијание врз грипот сè уште се во рана фаза, а научниците нагласуваат дека се потребни дополнителни испитувања кај луѓе, бидејќи досегашните резултати се добиени „in vitro“.

Калинката се користи од дамнина

Лековитите својства на калинката се ценети со векови. Старите Египќани ја користеле при разни инфекции поради нејзиното антибактериско дејство, додека во ајурведската медицина со илјадници години се применувала како помош при дијареја и дизентерија. Но, тоа не е единственото поле што се истражува.

Една студија објавена во 2017 година покажала дека калинката би можела да има ефект и против херпес, додека понови истражувања од Тајланд укажуваат дека би можела да делува и против бактерии што се пренесуваат преку храна, како ешерихија коли, салмонела и листерија.

Во некои лабораториски истражувања се споменува и активност на сокот од калинка против ХИВ-1, иако тоа не значи дека обезбедува заштита во реални услови. Поради таа разновидност, во една студија од 2013 година се наведува дека „речиси секој дел од растението калинка бил тестиран за антимикробна активност, вклучувајќи го сокот, кората од плодот, семките, цветовите и кората од стеблото“.

Иако калинката содржи различни фитохемиски соединенија, многу студии истакнуваат дека токму пуникалагинот покажува најсилно дејство.

Совети од диететичари

Диететичарите се согласуваат дека калинката е паметен додаток во исхраната во текот на целата година. Шенон Хајнс, регистрирана диететичарка од болницата „Backus“, неодамна ја пофали калинката и нејзините нутритивни вредности.

„Калинката е едно од оние овошја што може да му користи на организмот на повеќе начини – за срцето, кожата и варењето, да наведам само дел од придобивките. Преполна е со антиоксиданси, витамини и влакна. И навистина е вкусна“, изјави таа.

За поддршка на имунитетот, таа предлага додавање семки од калинка во јогурт, смути, овесна каша, салати или кус-кус, како и во различни житарици. Сокот од калинка исто така може да биде добар избор, но се препорачува умереност поради природната содржина на шеќер.