Нивната пазарна цена достигнува неверојатни 5.800 долари (околу 5.050 евра) по унца (приближно 28 грама), пишува порталот „Earth.com“.

Главната причина за толку високата вредност е индустријата на традиционалната кинеска медицина – сектор чија вредност, според податоците на Светската здравствена организација, изнесува околу 60 милијарди долари (околу 52 милијарди евра) годишно.

Жолчните камења, сомелени во прав, се клучна состојка во препарати за кои некои веруваат дека можат да помогнат во закрепнување по мозочен удар и други сериозни болести.

Инаку, жолчниот камен е стврдната наслага од холестерол (80–85%) или билирубин (пигментен), која се формира во жолчната кеса. Меѓутоа, за разлика од човечките жолчни камења, кај говедата тие најчесто се состојат од калциумови соли, како што се калциум-карбонат и калциум-фосфат.

Таквата посебна структура е последица на специфичниот дигестивен систем на говедата, прилагоден за преработка на големи количини растителен материјал.

Се развива кај постари животни

Интересно е што жолчните камења кај живо говедо не можат да се откријат без медицински преглед, па вистинската вредност на поединечното животно останува непозната сè до преработката.

Некои земјоделци дури размислувале за вештачки методи за поттикнување на создавање жолчни камења, но експертите силно не ги препорачуваат таквите практики.

Д-р Даниела Гомез да Силва, истражувачка на Државниот универзитет во Сао Пауло, предупредува на уште еден ироничен пресврт: како што современите методи на одгледување добиток стануваат сè поефикасни и животниот век на говедата се скратува, можно е да дојде до намалување на појавата на жолчни камења.

Имено, помладите животни едноставно немаат доволно време да ги развијат овие вредни творби.

И науката ги истражува

Медицинската оправданост за користење на овие камења го привлече вниманието и на научниците.

Истражувања на Универзитетот во Хонг Конг покажале ветувачки резултати во врска со одредени соединенија што се наоѓаат во традиционалните препарати со прав од говедски жолчни камења, особено во контекст на заштита на мозокот при исхемичен мозочен удар. Сепак, конечните резултати сè уште не се објавени, бидејќи истражувањата се во тек.

Како што пишува порталот „Oddity Central“, кинески истражувачи развиле и вештачки „одгледани“ жолчни камења, кои наводно покажуваат слични својства како природните.

Лабораториските алтернативи би можеле во иднина да го запрат понатамошниот раст на цените, но природниот жолчен камен сè уште се смета за златен стандард.

Предизвици за земјоделскиот сектор

Експлозивниот раст на пазарот донесе и неочекуван предизвик за земјоделскиот сектор.

Некогаш сметани за отпад, денес вредните говедски жолчни камења го привлекоа и вниманието на организираниот криминал.

Се појавија софистицирани шверцерски групи кои ги пренесуваат преку граници, а некои производители се соочиле дури и со вооружени грабежи.

Во многу погони за преработка на месо се воведени дополнителни безбедносни мерки, а информациите за пронаоѓање на жолчни камења често се чуваат во тајност.

Властите во Бразил, една од земјите од кои жолчните камења стигнуваат на кинескиот пазар, откриле и бројни обиди за фалсификување, при што на вистинските камења им се додаваат супстанции како шеќер или прашина од тули за да се зголеми тежината и заработката.

Продажбата на говедски жолчни камења претставува и дополнителен извор на приходи за сточарите во Африка. На социјалните мрежи може да се најдат бројни профили што нудат нивен откуп или продажба.