Техничките проблеми што следеле по иранските напади првично ги попречиле нивните планови, изјавиле претприемачите за „Ројтерс“, зборувајќи под услов да останат анонимни поради чувствителноста на ситуацијата. Еден од нив подоцна успеал да ги префрли парите на својата сметка во Сингапур преку друга банка во Обединетите Арапски Емирати.

Инвеститорите се вознемирени

Многу други богати Азијци се распрашуваат или веќе преземаат слични потези за да ги префрлат своите средства од Дубаи во регионални финансиски центри како што се Сингапур и Хонгконг. Советниците и адвокатите од финансиската индустрија наведуваат дека војната меѓу САД и Израел против Иран го поткопува статусот на Персискиот Залив како „безбедно засолниште“ и ги вознемирува инвеститорите.

Иако богатите инвеститори обично ги диверзифицираат своите инвестиции по регион и вид на средства, тие избираат каде да го базираат својот бизнис врз основа на даночни, регулаторни, приватни и оперативни причини. Во последниве години, Дубаи се профилираше како омилен центар за претприемачи и богати семејства од Азија, особено од Кина, кои беа привлечени од неговите поволни политики.

Покрај тоа, благодарение на процутот на пазарот на недвижности и развојот на инфраструктурата, регионот на Персискиот Залив стана многу привлечна инвестициска дестинација.

Веќе не е безбедно

Тој тренд сега е доведен во прашање бидејќи нападите врз Дубаи и Абу Даби го разнишаа угледот на Обединетите Арапски Емирати како стабилна и безбедна земја.

Адвокатот за приватно богатство со седиште во Сингапур, Раџан Лин, изјавил дека оваа недела бил контактиран од шест или седум од неговите 20 клиенти од Дубаи, од кои секој има просек од околу 50 милиони долари средства. Тројца од нив планираат веднаш да ги префрлат своите средства во Сингапур.

Еден клиент, како што вели тој, „проверува колку брзо може да префрли сè во Сингапур“.

Ирис Сју, директорка на глобалната фирма за корпоративни и фондски услуги „Anderson Global“, изјавила дека помеѓу 10 и 20 семејни канцеларии се обратиле до нејзината фирма оваа недела со прашања за преместување на средства од Блискиот Исток назад во Сингапур, поради стравувањата дека конфликтот би можел да се одолговлекува.

Семејните канцеларии се компании кои управуваат со средствата на богати поединци и семејства.

„Дубаи отсекогаш бил привлечен поради даночните олеснувања, но сега мислам дека овие олеснувања можеби повеќе не се нивен главен приоритет“, изјавила таа.

Еден советник за управување со богатство од Сингапур, кој зборувал под услов на анонимност бидејќи не е овластен да зборува со медиумите, изјавил дека досега разговарал со 13 клиенти од ОАЕ, од кои повеќе од половина сериозно размислуваат да преместат средства во Сингапур.

Патувања по конфликтот

„Патувањата ќе бидат предизвикувачки дури и ако конфликтот заврши утре. Ова е прашање на доверба“, изјавил советникот.

Грејс Танг, извршен директор на „Filip private equity“, вели дека нејзините клиенти, претежно од Азија, се нервозни и дека помеѓу 10 и 20 од нив се распрашуваат за преместување на богатството во Сингапур за заштита на капиталот.

Стратегија „Чекај и гледај“

Сепак, не сите менаџери го сметаат за предност тоа што сегашниот конфликт на Блискиот Исток предизвикува моментален одлив на капитал.

Друба Џоти Сенгупта, извршен директор на „WRISE Private Middle East“ со седиште во Дубаи, изјавил дека фирмата не забележала „сериозни разговори за одлив на капитал“ бидејќи клиентите се уверени во долгорочната стабилност на Обединетите Арапски Емирати.

„Ова се софистицирани глобални инвеститори, веќе меѓународно диверзифицирани, но исто така силно инвестирани во приказната за раст на ОАЕ“, изјавил тој.

„И покрај пошироките геополитички превирања во регионот, клиентите се чувствуваат безбедно и заштитено“.

Гувернерот на Централната банка на ОАЕ, Халид Мохамед Балама, во четврток изјавил дека банкарскиот и финансискиот сектор е отпорен, силен и стабилен и добро подготвен да се справи со регионалните настани. Тој додал дека банките, финансиските компании и осигурителните компании работат нормално и без прекин.

Водечките менаџери на средства во Сингапур, „Bank of Singapore и DBS Group“, изјавиле дека нивните клиенти внимателно ги следат случувањата во регионот и засега имаат став „почекај и види“.

Додека ОАЕ се стреми да го задржи својот статус на финансиско безбедно засолниште, некои инвеститори продолжуваат со плановите за проширување во Емиратите.

Џереми Лим, коосновач на „GrandWay Family Office“, моментално е во процес на отворање семејна канцеларија во Абу Даби и вели дека неговите планови не се променети - сè додека ОАЕ не се вклучат директно во конфликтот и под услов да нема понатамошна ескалација од страна на Иран.