За видливи резултати, не е потребно целосно да ја промените исхраната или да тренирате за маратон. Малите промени во секојдневниот живот можат да направат голема разлика со текот на времето.

Значи, треба да ги правиме овие пет работи почесто:

Јадење повеќе храна од растително потекло

Семето, мешунките и интегралните житарки се храна за која кардиолозите велат дека треба почесто да се консумира. Колку е поблиска нашата исхрана до исхраната базирана на растенија, толку е подобра не само за кардиоваскуларното здравје, туку и за здравјето на цревата, мозокот и другите органи. Овие намирници обично содржат помалку заситени масти и повеќе влакна, што помага во намалувањето на холестеролот во крвта. Се препорачува да додадете неколку бобинки, јаткасти плодови, семки или свеж лиснат зеленчук во постојните оброци.

Помалку седење

Седечкиот начин на живот го зголемува ризикот од срцеви проблеми, поради што кардиолозите препорачуваат поголема активност. Вежбањето помага во зајакнувањето на срцето со намалување на крвниот притисок, намалување на LDL (лошиот) холестерол, зголемување на HDL (добриот) холестерол и намалување на воспалението. Секаков вид физичка активност е корисен за здравјето на срцето.

Негување на социјални односи

Осаменоста и депресијата исто така имаат значително влијание врз здравјето на срцето. Истражувањата покажаа дека лошите социјални односи во средната и старата возраст го зголемуваат ризикот од кардиоваскуларни заболувања за 16 проценти.

Доколку ви недостасува социјална поврзаност, се препорачува да поминувате повеќе време со најблиските или да се занимавате со некое хоби. Домашните миленици исто така штитат од висок крвен притисок и срцеви заболувања.

Пиење засладени пијалаци

Консумирањето засладени и вештачки засладени пијалаци е поврзано со поголем ризик од мозочен удар, хипертензија и коронарна срцева болест. Се смета дека засладените пијалаци го зголемуваат нивото на шеќер во крвта, што може да предизвика воспаление и инсулинска резистенција. Секогаш давајте предност на незасладени пијалаци, а како алтернативи се препорачуваат вода и кафе или чај без шеќер.

Престанок со пушење

Пушењето е главен фактор на ризик за срцеви заболувања. Престанокот со пушење помага во намалување на натрупувањето на плаки во артериите (артериосклероза) и воспалението, ја подобрува циркулацијата и го намалува ризикот од згрутчување на крвта.

Истражувањата покажуваат дека во рок од четири години од престанокот со пушење, ризикот од мозочен удар е значително намален. Иако целосното престанување со пушење е најдобрата опција, за долгогодишните пушачи понекогаш е пореално постепено да се намалува бројот на цигари што ги пушат.