Поточно, цените на нафтата утрово се зголемија на 112 долари за барел. Војната на Блискиот Исток сега заканува да предизвика сериозен колапс низ целиот свет и да доведе до рекордни цени на нафтата во последните 40 години.

Според најновите информации, референтната цена на нафтата „Brent“ достигна 112 долари за барел во раната трговија во Азија ова утро, што е повеќе од 5% над нивото од вторникот.

Откако беше нападнато најголемото гасно постројување, цените на нафтата се искачија до небо

Референтната цена на гасот во Велика Британија исто така се зголеми за 6%, на 143,53 пени по терм.

Скокот на цените на нафтата и гасот следуваше по извештајот дека е погоден иранскиот петрохемиски комплекс на гасното поле Јужен Парс. Неколку часа подоцна, Катар соопшти дека дошло до „голема штета“ на индустрискиот комплекс Рас Лафан, по заканите од Иран.

Од Иран соопштија дека пожарот во петрохемискиот комплекс е ставен под контрола, пренесе агенцијата Тасним, која е поврзана со Револуционерната гарда на Иран.

Иранската армија предупреди дека ќе преземе „одлучни мерки“ како одговор на нападот врз енергетската инфраструктура.

Иран се заканува со одмазда

„Како што претходно беше предупредено, доколку американско-ционистичкиот непријател го нападне нашиот инфраструктурен систем за гориво, енергија, гас и економија, покрај силен контранапад, сериозно ќе го погодиме и изворот на таа агресија. Сметаме дека легитимни цели се инфраструктурите за гориво, енергија и гас на земјите од кои потекнува агресијата и ќе возвратиме силно во најкус можен рок“,истакна иранската армија.

За да ситуацијата биде уште полоша, Катар, земја која произведува петтина од светскиот течен природен гас, претходно во март го прекина производството поради судири.

Портпаролот на катарското Министерство за надворешни работи, Маџед Ал Ансари, изјави дека нападите врз енергетската инфраструктура „претставуваат закана за глобалната енергетска безбедност“.

Енергетските пазари се екстремно нестабилни, светот се соочува со закана од колапс

Директорката за финансиски анализи во компанијата „AJ Bell“, Дани Хјузон, изјави дека нападот и иранскиот одговор „повторно ги зголемиле тензиите и вршат нов притисок врз растот на цените на нафтата“.

„Било какво решение за блокадата на Ормускиот теснец во моментов изгледа прилично далечно, и додека не се постигне напредок по тој план, енергетските пазари ќе останат нестабилни“, додала таа.

Белата куќа во среда реагираше на растот на цените на нафтата со најавата дека ќе ја суспендира примената на Џонсoвиот закон – регулатива од 1920 година која предвидува дека за транспорт на стоки меѓу американските пристаништа можат да се користат само бродови произведени во САД.

Портпаролката на Белата куќа, Керолјан Левит, изјави дека ослободувањето од правилата во траење од 60 дена ќе овозможи „критичните ресурси како нафта, природен гас, ѓубрива и јаглен да течат слободно“, бидејќи сега ќе може да се користат и бродови кои не се произведени во САД.

Сепак, поморските организации во САД оценија дека ефектот ќе биде минимален, истакнувајќи дека зголемувањето на цените на бензинските пумпи го предизвикале цените на нафтата, а не трошоците за транспорт.

Меѓутоа, Иран исто така ја прекина испораката на гас за Ирак за да обезбеди доволно залихи за домашните потреби, изјави за Ројтерс висок ирачки функционер.