„Hyundai Exter“ дебитираше на индискиот пазар во 2023 година, а сега веќе поминува низ прв редизајн. Освежениот модел доби суптилни промени во дизајнот, повеќе технологија во ентериерот и нови опции за опрема, но ја задржа онаа карактеристика по која стана познат – многу пристапната цена.

Суптилни промени однадвор

На предниот дел „Exter“ ги задржува препознатливите поделени LED светла со графика во форма на буквата H, но сега со редизајниран браник. Промените вклучуваат поголема маска на ладилникот, нов декоративен елемент во алуминиумски стил и нова позиција на значката со името на моделот.

Бочниот профил доби поизразени пластични облоги околу лакот на тркалата, кои потсетуваат на проширени калници, како и нов дизајн на 15-инчните алуминиумски фелни.

На задниот дел се наоѓа нов кровен спојлер со двојни крила, поедноставен декоративен елемент меѓу задните светла и редизајниран браник. Понудата на бои е проширена со новите нијанси „Golden Bronze“ и „Titanium Black Matte“.

„Hyundai Exter“ е долг само 3.995 милиметри, што го прави најмалиот SUV во понудата на „Hyundai“ за Индија. Сепак, тој е околу 40 сантиметри подолг од моделот „Hyundai Casper“, кој се продава во Јужна Кореја, односно околу 20 сантиметри подолг од електричниот „Inster“.

Ентериер со повеќе технологија

Во кабината е задржан 8-инчниот инфотејнмент систем, кој сега поддржува безжичен „Android Auto“ и „Apple CarPlay“. Ентериерот доби нова комбинација на навлаки во темносина и сива боја, како и декор во карбон стил на инструмент таблата.

Новитети се камера за снимање при возење („dashcam“), управувач со рамно отсечен долен дел, метални облоги на педалите, нов централен потпирач за рака и USB-C приклучоци. Дополнително, приспособувањето на висината на возачкото седиште сега е стандард во сите верзии, како и шест воздушни перничиња, систем за електронска стабилност и асистенција при тргнување на нагорнина.

Моторите остануваат исти

Понудата на мотори не е променета, а „Exter“ и понатаму е достапен само со погон на предните тркала. Основата ја сочинува атмосферски бензински мотор од 1.2 литри со четири цилиндри, кој развива 83 коњски сили и 114 Nm.

Достапна е и верзија што користи природен гас. Во тој случај моторот развива 69 коњски сили и 95 Nm. Бензинската верзија има багажник со капацитет од 391 литар, додека верзијата со CNG, поради резервоарот за гас, располага со 225 литри.

Еден од најевтините SUV модели на пазарот

Цената за „Hyundai Exter“ во Индија започнува од околу 5.500 евра, додека најопремената верзија чини околу 9.000 евра. Тоа е благо зголемување во однос на претходниот модел, но „Exter“ и понатаму останува значително поевтин од конкуренцијата.