Поглед кон далечната страна на Месечината

Екипажот на „Artemis II“ ги забележал овие сцени во понеделник, на 6 април, додека леталото „Orion“ кружело околу страната на Месечината која не е видлива од Земјата.

Небо полно со ѕвезди

По успешниот прелет, астронаутите во вторник, на 7 април, снимија и фотографија од нашата галаксија, Млечниот Пат, која го одзема здивот.

Да потсетиме, мисијата „Artemis II“ изведе историски прелет околу Месечината, при што астронаутите забележаа спектакуларни појави како „зајдисонце на Земјата“ и ретка затемнување на Сонцето од вселената. За време на седумчасовниот прелет, екипажот направил околу 10.000 фотографии, набљудувајќи ја површината на Месечината од досега невидена перспектива, при што околу 21 отсто од далечната страна на Месечината била осветлена од Сонцето.

Астронаутите сведочеле на „зајдисонце на Земјата“

Комуникацијата со Земјата била прекината околу 40 минути додека леталото „Orion“ поминувало зад Месечината. Во тој период астронаутите сведочеле на „зајдисонце на Земјата“, сцена во која нашата планета се спушта зад месечевиот хоризонт, слично на она што го виделе астронаутите на „Apollo“ во 1968 година.

Посебно доживување било и затемнувањето на Сонцето, кое од нивна перспектива траело речиси еден час, значително подолго отколку на Земјата. За време на овој феномен јасно ја виделе сончевата корона, опишана како структури „како фина детска коса“, а можеле да забележат и планети како Марс, Венера и Сатурн.

По прелетот, командантот Рид Вајсман им се заблагодари на тимот на „NASA“ со зборовите: „Бевме добро подготвени и ви благодариме на сите, ова е она што најдобро го правиме кога сме заедно и дејствуваме како тим. Сите го изведовте ова совршено. Ви благодариме што ни ја овозможивте оваа прилика.“

Научничката д-р Келси Јанг порача: „Не можам доволно да нагласам колку научни сознанија веќе стекнавме и колку инспирација му дадовте на целиот наш тим, на заедницата на лунарни научници и на целиот свет. Денес навистина ни ја доближивте Месечината.“