Иако веќе речиси десет години е на самиот врв на Јутјуб сцената, пред сè благодарение на спектакуларните предизвици и општествените експерименти, за приватниот живот ретко зборува.

Нема рамнотежа меѓу работата и приватниот живот

Во редок осврт на животот надвор од камерите, Мистер Бист, чие вистинско име е Џими Доналдсон, рекол дека практично воопшто не ја познава рамнотежата меѓу работата и слободното време. За тоа зборувал во Јутјуб видеото насловено „Како Мистер Бист работи 18 часа дневно“.

„Живеам за да работам и воопшто не се грижам за рамнотежата меѓу работата и приватниот живот“, напишал тој на социјалната мрежа Икс. Во самиот документарец додал: „Вистинско чудо е ако мојот работен ден трае помалку од 15 часа. Деновите ми се буквално испланирани во минута. Сè мора да биде совршено бидејќи едноставно немам многу време“.

Милијардер без готовина

И покрај исцрпувачката работа и проценетото богатство од 2,6 милијарди долари, според податоците на „Celebrity Net Worth“, Мистер Бист тврди дека речиси и нема расположлива готовина. „Во моментов сум во минус, позајмувам пари. Имам толку малку готовина“, изјавил претходно оваа година во интервју за „Волстрит џурнал“.

„Технички гледано, секој кој го гледа ова веројатно има повеќе пари на банкарската сметка од мене, ако се изземе вредноста на моите удели во компанијата. А со тоа наутро не можам ни да си купам појадок во Мекдоналдс“, појаснил тој.

Целосна посветеност на работата

Својата финансиска состојба ја објаснил со целосната насоченост кон работата. „Се будам и веднаш работам. Толку сум преокупиран со работата што воопшто и не размислувам за мојата приватна банкарска сметка. Во целост сум фокусиран на создавање на најдобрите можни видеа и на проширување на бизнисот“, нагласил тој.

Неговиот последен голем проект бил преносот во живо на Јутјуб со уште четворица креатори, за време на кој на гледачите им поделил 1,5 милиони долари.