Последното место каде што би очекувале да најдете варен рак е во сладолед, но токму тоа го нуди една слаткарница во Хјустон, Тексас, за време на врвот на сезоната на ракови во пролет.
Сопственичката на слаткарницата „Red Circle Ice Cream“, Ники Нго, изјавила за Ројтерс дека почнала да служи сладолед од ракови во 2019 година, кога дошла до таа идеја додека јадела ракови на семеен собир.
Процесот започнува со мешање растопен путер, каџун мешавина од зачини, лук и други состојки, пред да се додадат живи ракови за варење. Соковите од раковите, путерот и зачините потоа се додаваат во кремаста база, која машински се меша во сладолед од ракови. Одозгора се става варен рак, со клештите што висат преку садот.
Нго дава неколку совети пред да им го послужи на љубопитните купувачи сладоледот што има сладок, солен и зачинет морски вкус.
„Секако, препорачувам да не бакнувате никого откако ќе ви дадам сладолед“, рекла таа.
Нго препорачува гостите прво да го изедат месото од ракот откако ќе ја откинат неговата глава, а потоа токму таа глава да ја искористат за да заграбат сладолед како со лажица.
Реакциите меѓу купувачите биле поделени — некои не биле воодушевени, додека други биле пријатно изненадени откако го пробале сладоледот од ракови.
Гостинката во слаткарницата, Лорен Мур, рекла дека вкусовите биле совршени.
„Ми се допаѓа. Малку е солено, но е кремасто, мазно. И малку зачинето“, рекла таа.
Нго изјавила дека уште од јануари почнува да добива повици од купувачи кои бараат сладолед од ракови.
