Ноќното будење е искуство што погодува многу луѓе, без оглед на возраста или начинот на живот. Иако често се смета за безопасно, честото прекинување на сонот може да има значително влијание врз физичкото здравје, менталната состојба и секојдневното функционирање.
Причините за ноќните будења се различни – од стрес и анксиозност, преку лоши навики на спиење, па сè до здравствени проблеми. Разбирањето на причините и последиците од овој феномен е првиот чекор кон пронаоѓање ефикасни решенија и повторно воспоставување квалитетен сон.
Преместувањето и будењето во различни моменти во текот на ноќта е прилично вообичаено, често предизвикано од бучава или потреба за користење на тоалет. Меѓутоа, ако тоа се случува редовно, би можело да биде показател за нешто посериозно.
Лекарот Амир Кан открива зошто се будите секоја ноќ во исто време. Во епизода од својот подкаст „No Appointment Necessary“, лекарот објасни дека упорното будење може да биде последица на високото ниво на кортизол, хормон што се ослободува кога вашето тело е под стрес.
„Кортизолот има она што го нарекуваме дневни варијации, што значи дека се менува во текот на денот, при што неговото ниво е повисоко наутро и преку ден, а потоа ноќе почнува да опаѓа. Меѓутоа, ако сте постојано под стрес, не го добивате тој пад на кортизолот, кој ви е потребен за да заспиете. Така што заспивањето станува навистина, навистина тешко“, наведе тој.
Лекарот наведе дека тоа може да доведе до будење во три или четири часот наутро секоја ноќ.
„Нивото на кортизол почнува да расте околу три или четири часот наутро, а потоа почнува да ве буди со разденувањето. Ако имате основен кортизол кој веќе е висок и тој почне природно да расте во три односно четири часот наутро, ќе станете во три или четири часот наутро затоа што тоа веќе не е природен пораст. Веќе сте започнале на многу повисоко ниво. Тоа будење во три наутро е толку вообичаено, нели? Толку е вообичаено“, наведе тој.
