Зошто истиот модел на „BYD“ во Европа чини 115.000 евра, а во Кина е трипати поевтин?

Додека во Кина овој електричен спортски караван чини од 269.800 јуани, односно околу 33.500 евра, во Европа започнува од околу 115.000 евра. Разликата е огромна, но не е случајна.

На прв поглед, дел од разликата може да се објасни со трошоците. Европската унија на кинеските електрични автомобили применува царини од 27 отсто, што вклучува 17 отсто „казнени“ царини за кинеските електрични возила и 10 отсто класични царини за сите автомобили од Кина. Тука се и трошоците за транспорт, хомологација, прилагодување на суспензијата на европските патишта, развој на продажна мрежа и ДДВ.

Сепак, дури и кога сето тоа ќе се додаде на кинеската цена, таа сè уште не достигнува ни половина од износот од 115.000 евра. Анализи, како онаа на „S&P Global Mobility“, јасно сугерираат дека клучот е во стратегијата.

„BYD“ не се обидува да ја продава „Denza“ како „евтин кинески автомобил“, туку како конкурент на етаблирани премиум модели. Цената е поставена така што се позиционира под модели како „Porsche Panamera“, што јасно ја покажува целната публика.

Таквиот пристап означува пресврт во перцепцијата на кинеските производители. Додека досега доминираа во пониските и средните сегменти, сега се обидуваат да влезат во премиум класата, каде што цената не е само трошок, туку и порака. Високата цена сигнализира ексклузивност, а дополнителната заработка овозможува финансирање на ширењето на инфраструктурата, продажната мрежа и маркетингот.

Токму маркетингот игра важна улога. Лансирањето на „Denza“ во Европа беше проследено со кампања со Даниел Крејг, што дополнително ја нагласува амбицијата на брендот да се позиционира рамо до рамо со луксузните имиња. Истовремено, самиот автомобил нуди импресивни бројки – 1.149 коњски сили, исклучително брзо полнење и напредни функции како можност за странично движење при паркирање. Сепак, влезот во премиум сегментот никогаш не е едноставен. Историјата покажала дека дури и етаблирани производители како „Lexus“ тешко освојуваат европски купувачи во тој ценовен ранг, пишува „Jutarnji.hr“.