И додека сите се прашуваат што ќе облече овојпат, нејзините изданија од Мет галата низ годините секогаш привлекувале огромно внимание.

Бијонсе првпат присуствуваше на настанот во 2008 година, носејќи нежна розова „Armani Privé“ креација. Сепак, подоцна сè повеќе го истакнуваше својот статус на икона, доминирајќи на црвениот тепих со смели комбинации.

Додека обожавателите со нетрпение чекаат вести за нејзиниот следен албум, многумина очекуваат навестувања токму преку нејзиниот стајлинг на Мет гала.

Во продолжение погледнете ги сите изданија на Бијонсе од Мет галата низ годините.

2008: Superheroes: Fashion and Fantasy

Бијонсе дебитираше на Мет гала во 2008 година, истата година кога го објави својот трет студиски албум „I am… Sasha Fierce“. Носеше светлорозов фустан без прерамки од „Armani Privé“, украсен со срцевиден изрез. Овој изглед беше значително посуптилен во однос на нејзините подоцнежни комбинации.

2011: Alexander McQueen: Savage Beauty

Три години подоцна, Бијонсе се врати на Мет гала во црно-златен везен фустан со сирена крој, со висок околувратник и чипкани детали, со потпис на Емилио Пучи. Тесниот корсет и кројот со шлеп ѝ го отежнуваа движењето по познатите скали на Мет.

На помош ѝ притрчаа нејзиниот сопруг Џеј Зи и стилистот Тај Хантер, кои буквално ја пренесоа до врвот. Косата ја носеше во едноставна пунџа, со минимална шминка и „Sergio Rossi“ потпетици.

2012: Schaparelli and Prada: Impossible Conversations

Таа година пејачката носеше фустан кој можеби ја инспирираше една од нејзините најпознати изјави – „I'm so reckless when I rock my Givenchy dress“. Бијонсе блесна во „Givenchy“ фустан украсен со скапоцени камења, со омбре пердувест шлеп, откако во последен момент одлучи да се појави на настанот.

Пејачката само неколку месеци претходно ја роди ќерката Блу Ајви и се подготвуваше за турнејата „The Mrs. Carter Show World Tour“. На самиот ден на настанот му рекла на стилистот Тај дека сака да оди и за само неколку часа бил создаден денес веќе култниот изглед.

2013: Punk: Chaos to Couture

Сè уште не знаевме колку Бијонсе ќе ја промени музичката индустрија таа 2013 година. Само неколку месеци подоцна го објави својот петти студиски албум „Beyonce“, кој означи нова ера и засекогаш го промени начинот на објавување албуми.

На Мет галата таа година носеше уште еден „Givenchy“ фустан – црн, кожен, без прерамки, со богати украси на корсетот. Комбинацијата ја надополни со црни ракавици и чизми над колена, во духот на панк темата.

2014: Charles James: Beyond Fashion

Веќе следната година, Бијонсе носеше елегантен, проѕирен црн „Givenchy Haute Couture“ фустан со длабок V изрез и висок шлиц. Го комбинираше со мрежест вел и црно-црвени обетки, со кармин во иста нијанса.

2015: China: Through the Looking Glass

Во веројатно нејзиното најпознато издание, пејачката носеше целосно проѕирен „Givenchy Haute Couture“ фустан дизајниран од Рикардо Тиши. Фустанот беше прекриен со „Swarovski“ кристали и камења, со отворен грб и богато украсен шлеп.

Иако самата креација привлече огромно внимание, нејзиниот поглед преку рамо и високиот реп беа вистински магнет за погледи.

2016: Manus x Machina: Fashion In An Age Of Technology

Последен пат кога присуствуваше на Мет галата, Бијонсе носеше латекс „Givenchy“ фустан во нијанса на праска, украсен со 2.000 пастелни цветови од бисери околу ракавите и корсетот. Изгледот го надополни со светли „Givenchy“ платформи.

Стајлингот го заокружи со темносина шминка и црн лак за нокти, со „Lorraine Schwartz“ прстени и чанта во соодветна боја.