Советникот на Владимир Путин, Јуриј Ушаков, им изјави на новинарите дека Русија не поканила конкретно странски претставници на парадата оваа година. Путин, сепак, ќе се сретне со својот белоруски колега Александар Лукашенко еден ден порано, и, како што пишува ТАСС, ќе разговараат за перспективите за развој на билатералните односи, како и за меѓународни, регионални и други прашања.

Во сабота, Путин ќе одржи официјален прием за странски делегации и почесни гости кои доаѓаат во Москва. Истиот ден, тој ќе одржи серија билатерални средби со шефовите на странски делегации – ќе се сретне со словачкиот премиер Роберт Фицо, малезискиот крал Султан Ибрахим, претседателот на Лаос, Тонглун Сисулит.

„Оваа година не испративме посебни покани, но некои странски претставници изразија желба да дојдат во Москва за време на овие празници и да учествуваат заедно со нашето раководство во настаните на 9 мај“, рече Ушаков.

Затегнати односи пред парадата

На 4 мај, руското Министерство за одбрана еднострано прогласи „прекин на огнот“ за 8 и 9 мај и предупреди дека доколку парадата за Денот на победата во Москва на 9 мај биде прекината, ќе се изврши голем ракетен напад врз центарот на Киев.

Портпаролката на руското Министерство за надворешни работи, Марија Захарова, повика дипломатите да бидат евакуирани од Киев пред она што го опиша како руски „одмазднички удар врз центрите за донесување одлуки“. Но, и покрај јавните закани на Кремљ дека повторно ќе го нападне Киев, Европската Унија изјави дека нема да ја промени својата позиција или присуство во украинскиот главен град.