[ВИДЕО] Легендарниот Шек магистрираше на 55-годишна возраст и го исполни ветувањето што одамна ѝ го дал на мајка си: Зад сè стои емотивна приказна

Иако во животот оствари сè што можеше да се оствари во спортот и бизнисот, Шек со овој потег покажа дека за образование никогаш не е доцна, а зад целата приказна се крие трогателна емотивна причина.

Иако го напушти „LSU“ уште во 1992 година за да ја започне професионалната НБА кариера, О’Нил тогаш цврсто ѝ ветил на својата мајка Лусил Харисон дека еден ден ќе се врати и ќе го заврши своето образование.

Низ годините постепено го исполнувал тоа ветување, а оваа најнова диплома од „LSU“ претставува круна на неговиот академски пат.

„ѝ ветив на мајка ми дека, без разлика на парите и славата, ќе го завршам образованието. Моето семејство отсекогаш го ценело образованието, а ова го правам за да ја направам горда и да им покажам на моите деца дека нема изговори кога станува збор за работа на себе“, изјави претходно О’Нил, кој се стекна со диплома по општествени науки.

Познато е дека Шек веќе поседува и титула доктор на науки, која ја стекна во 2012 година, но враќањето на „LSU“ за него има посебно емотивно значење бидејќи токму на тој универзитет започна неговата глобална кошаркарска приказна.

Сепак, церемонијата на дипломирање не би била целосна без препознатливиот хумор на Шек. За време на прославата на овој голем успех, О’Нил не ја пропушти можноста да се пошегува на сметка на својот колега од емисијата „Inside the NBA“ и вечен ривал Чарлс Баркли.

Додека гордо позираше со дипломата, Шек низ смеа дофрли дека сега во својата колекција има „повеќе дипломи отколку што Чарлс Баркли има шампионски прстени“, повторно потсмевајќи му се на својот пријател поради фактот што Баркли во текот на играчката кариера никогаш не освоил НБА титула.

Со овој чин, Шекил О’Нил уште еднаш испрати силна порака до младите спортисти ширум светот дека спортската кариера, колку и да е успешна, не ја исклучува важноста на високото образование и личниот развој.