Ѕвездата на серијата „Desperate Housewives“, Ева Лонгорија, го освои црвениот тепих на Филмскиот фестивал во Кан во бел фустан што се влечеше зад неа.
Повод за нејзиното доаѓање беше премиерата на филмот „Histoires de la Nuit“, напната драма за упад во дом што ја затвори официјалната конкуренција на 79-то издание на фестивалот.
Лонгорија се појави во издание што потсетува на свадбена естетика, носејќи фустан од „Tamara Ralph“ изработен од бел свилен сатен.
Горниот дел од фустанот имаше корсет во форма на лепеза, кој беше украсен со седеф и кристали. Сатенските сандали „Anastasia“ од брендот „René Caovilla“ имаа потпетица од 15 центиметри.
Како амбасадорка на брендот „L’Oréal Paris“ од 2005 година, Лонгорија стана неизбежно лице на фестивалот на Кроазета во текот на последните две децении.
Освен актерската кариера, Лонгорија успешно се занимава и со режија. По биографскиот филм „Flamin’ Hot“, моментално ја режира комедијата на „Netflix“, „The Fifth Wheel“, во која глумат Ким Кардашијан и 50 Сент.
Премиерата на филмот собра и бројни други славни личности, меѓу кои беше и Моника Белучи, која во филмот ја толкува улогата на италијанската сликарка Кристина.
Филмот „Histoires de la Nuit“ го режираше Леа Мисиус, а претставува адаптација на романот на Лоран Мовињие од 2020 година. Дејството следи семејство во руралниот француски Лимузен, чија прослава на роденден се претвора во насилен пекол по упадот на непознати лица во куќата. Главните улоги ги толкуваат Хафсија Херзи, Бастиен Бујон и Беноа Мажимел.
Судбината на ова остварување, едно од 22-те наслови во официјалната конкуренција, ќе ја одреди жирито под водство на Парк Чан-вук, во кое членуваат и Деми Мур, Клои Жао и Стелан Скарсгард.
Добитникот на престижната Златна палма („Palme d’Or“) ќе биде прогласен во сабота, 23-ти мај.
