Работата ја нашол преку посредник, исто така Балканец, но наместо професионални услови, тврди дека го дочекало големо разочарување.

Неговата објава на социјалните мрежи, во која опишува пренатрупани и мувлосани соби, доцнење на платата и спорни одбитоци, предизвикала бројни реакции и отворила расправа за искуствата со работа кај работодавци од Балканот во Германија.

„Нè смести четворица во една соба“

„Кога пристигнав, нè смести четворица во една соба. Мувла насекаде, а бањата ја делиме со уште осум луѓе“, напишал работникот.

Проблемите, како што тврди, продолжиле уште со првата плата. „Првата плата ми доцнеше речиси три недели, а кога конечно стигна, голем дел отиде за сместување и за некакви измислени трошоци за документи. Ми остана едвај доволно за храна“, се пожалил тој.

„Ако не ти се допаѓа, пакувај ги куферите“

Кога се обидел да разговара со шефот за помалата исплата, вели дека добил многу груб одговор. „Ако не ти се допаѓа, пакувај ги куферите. На граница има стотици луѓе што го чекаат твоето место“, наводно му рекол работодавецот.

Поради сето тоа, на социјалните мрежи ги прашал другите корисници дали случајот треба да го пријави во германската инспекција за труд и во царинската служба „Zoll“. „Večernji list“ пишува дека тврдењата од објавата не можел независно да ги провери.

Поделени реакции во коментарите

Објавата предизвикала стотици коментари. Многумина го советувале да го пријави работодавецот кај надлежните институции. „Пријави го. Zoll едвај чека вакви случаи“, напишала една корисничка.

Други ги споделиле сопствените искуства и тврделе дека е посигурно да се работи за германски отколку за балкански работодавци: „Бегајте од нашите“, „Нашите се најлоши“ и „Попрво би работел што било друго отколку за балканска фирма“, се само дел од коментарите.

Еден корисник напишал дека им помагал на работници кои поради лошите услови морале да се вратат дома, бидејќи немале ни за основни трошоци.

„Не се сите исти“

Од друга страна, дел од корисниците ги бранеле работодавците од регионот и тврдат дека постојат и бројни позитивни примери.

„Работев три години кај Балканец и немаше почесен човек“, напишал еден корисник, додека друг навел дека поради прекувремена работа добил дополнително платен одмор.

Има и такви кои сметаат дека дел од одговорноста ја сносат самите работници. „Треба добро да се прочита договорот пред потпишување и да не се потпирате на усни договори“, истакнал еден корисник.