Снимката од корисникот „@j0792433“ ја прикажува речиси празниот ресторан „Гордон Ремзи Стек“ во Ричмонд, Канада. Два глувци трчаат меѓу масите додека вработените, облечени во костуми, ги гледаат, очигледно чекајќи помош за да го решат проблемот.

Во заднината на видеото, кое досега собра речиси 300.000 прегледи, може да се слушне како еден гостин вели: „Имате двајца“, додека друг на шега додава: „Уживајте во вашата бесплатна вечера, луѓе“, имплицирајќи дека ресторанот, кој работи како дел од казино-ресортот Ривер Рок, треба да им надомести на гостите за непријатното изненадување.

Некои се згрозени, други велат дека тоа се случува често

Додека некои корисници го изразија своето згрозување во коментарите, други истакнаа дека појавата на глодари не е невообичаена, особено во Ричмонд. „Тоа е Ричмонд. Ќе ви биде тешко да најдете ресторан што ги нема“, напиша еден корисник.

Сопственикот на компанија за дератизација, исто така, се огласи и се обиде да ја смири дебатата: „Јас сум сопственик на компанија за дератизација. Ова може да се случи во секое време и на кое било место. Тоа не значи дека ресторанот е валкан или дека кујната не е уредна“.

Кога биле прашани дали биле почестени со вечера во ресторанот, креаторот на видеото објавил фотографија од сметката. На сметката може да се види дека добиле попуст од 100 долари на скапиот оброк.

„Барем изгледаат навистина изненадени“

Видеото брзо стана вирално и на Редит каде што бројни корисници истакнаа дека присуството на глувци или стаорци не е нужно показател за лоша хигиена. „Некои од најдобрите ресторани во Франција имаат стаорци“, напиша еден корисник.

„Стаорците и глувците се траен проблем во многу ресторани. Можете да направите што и да треба и сепак да се борите против нив. Многу зависи од староста на зградата, соседните згради, соседството и самиот регион“, додаде друг.

Трет се обиде целата ситуација да ја претвори во шега: „Позитивното е што персоналот изгледа навистина изненаден. Ако рекле: „О, тоа се Бил и Тед“, тогаш тоа веќе би била сериозна причина за загриженост“.

Еден вработен во ресторан се надоврза на ова, признавајќи дека вработените честопати се подготвени за такви ситуации однапред. „Сите нè учеа да се преправаме дека сме изненадени. Обично само ќе кажевме: „Тоа е стара зграда“, напиша тој.