Директорот на еден од најголемите автомобилски брендови, призна: „Повеќе не заработуваме доволно“ - се укинуваат 50.000 работни места

Блуме на онлајн состанок им рече на акционерите дека ситуацијата во „Volkswagen“ е „напната и тешка“, велејќи дека условите во автомобилската индустрија дополнително се влошиле во 2026 година.

„Нашиот бизнис модел, кој беше успешен со децении, денес повеќе не функционира. Мораме дополнително да го развиваме“, изјавил тој.

Извршниот директор ги истакнал клучните точки за новата стратегија на производителот на автомобили за 2030 година, која беше објавена во мај.

Целта на „Volkswagen“ е да стане „најатрактивниот производител на автомобили во светот“ до крајот на оваа деценија, со поврат на продажбата помеѓу 8 и 10 проценти, посочил директорот.

Нови модели како неодамна воведениот електричен „ID. Polo“ покажуваат дека брендот е на вистинскиот пат и „повторно е на чело на конкуренцијата“, тврди Блуме.

„Сепак, не заработуваме доволно пари од нив“, продолжил тој.

Само во централниот бренд „Volkswagen“, 35.000 работни места ќе бидат намалени до 2030 година. Работната сила веќе ќе се намали за 19.000 до крајот на 2026 година, како што посочил Блуме, објаснувајќи дека веќе се договорени околу 28.000 доброволни заминувања.

„Фабричките трошоци во германските фабрики на „VW“ паднаа за повеќе од 20 отсто во 2025 година“, додал тој.

Блуме, исто така, ги потврди своите планови за дополнително намалување на капацитетот на фабриката. До 2030 година, тој сака да го намали капацитетот на своите европски фабрики за дополнителни 500.000 возила – покрај веќе тековното намалување од еден милион возила до 2028 година.

Истиот број ќе биде намален во Кина, со што вкупното глобално намалување ќе достигне еден милион автомобили до 2030 година, известува „Fenix“.

Иако тековните програми за штедење веќе имаат ефект, намалувањето на трошоците се компензира со нови оптоварувања од царини, трговски бариери и геополитички ризици.

Состанокот на акционери повторно се одржува целосно преку интернет, како и во изминатите две години. Управниот и надзорниот одбор дури и не се во Волфсбург, туку се придружиле од Минхен.

Блуме последен пат лично ги прими акционерите во 2023 година.