Со само неколку лесно достапни состојки ќе добиете оброк што е вкусен и топол и ладен, па без проблем можете да го спакувате за на работа, на училиште или за патување.

Овој рецепт лесно можете да го приспособите на вашиот вкус. Во филот додајте пченка, печурки, шунка, спанаќ или омилени зачини. Одлично се комбинира и со моцарела, фета сирење или кашкавал.

Потребни состојки

• 2 варени јајца
• 150 гр. тврдо сирење, изрендано
• 200 гр. варено пилешко месо
• свежи ароматични билки по желба (магдонос, копар или власец)
• 2 лажици павлака
• 2 до 3 листови лаваш

Подготовка

Ситно исечкајте ги варените јајца и пилешкото месо, па измешајте ги со изренданото сирење, павлаката и ситно сечканите ароматични билки. Добро промешајте за да добиете компактен и сочен фил.

Лавашот исечете го на подолги ленти. На крајот од секоја лента ставете по една лажица фил, а потоа превиткувајте го тестото во форма на триаголник или плик, така што филот ќе остане целосно затворен.

Пржете ги во загреана тава со малку масло по неколку минути од двете страни, додека не добијат златна и крцкава кора. По желба, можете да ги подготвите и на грил-тава.

Крцкавите триаголници од лаваш се одлични и кога ќе се изладат, поради што се идеален избор за ужина на работа.