Кога се запознале, Арсен почнувал да ја гради својата музичка кариера, додека Габи веќе беше голема ѕвезда на југословенската сцена и соработуваше со познати светски музичари.

„Кога ја запознав, беше мажена. На почетокот бевме пријатели и соработници, а кога се разведе, не ми веруваше многу бидејќи, како колешка, со неверување слушаше за мојот претходен живот. Наскоро моите пријателки една по една ги испраќаше дома. Во еден момент и двајцата сфативме дека не можеме еден без друг. Решивме од тоа да не правиме голема љубовна приказна, туку едноставно почнавме да живееме заедно“, раскажуваше своевремено Арсен.

„Беше слаб и блед“

Габи добро се сеќавала на првата средба со човекот кој подоцна ќе стане нејзината најголема љубов.

„Нè запозна текстописецот Марио Бољуни. Ми рече дека од Шибеник дошол некој Игор Кримов, кој всушност се вика Арсен Дедиќ. Беше толку слаб, блед... како некое момче. Арсен го направи преводот за песната „Netko bdije nada mnom“ за мојот прв ЛП во 1962 година. Постојано комунициравме и станавме многу добри пријатели, како брат и сестра. Нашето пријателство беше убаво и нежно“.

И двајцата зад себе веќе имаа бракови кои не опстанаа. Арсен претходно беше оженет со Весна Матош, подоцна Сулигој, која беше во роднинска врска со поетот Антун Густав Матош. Во тој брак ја доби ќерката Сандра.

Габи најпрво беше мажена за филозофот и академски сликар Богдан Дебењак, а потоа и за композиторот Стипица Калоѓера.

„Тој зад себе имаше живот со различни жени, а јас зад себе имав два неуспешни брака. Еден ден во нашето пријателство се роди потопол однос, но по многу години“, зборуваше Габи.

Љубовта се родила постепено

Меѓу нив, како што и двајцата истакнуваа, немало ненадеен занес. Чувствата се развивале постепено, од блискоста и довербата што со години ја граделе.

„Откако и двајцата останавме сами и разведени од претходните партнери, станавме љубовници, потоа родители на нашиот Матија, а еден месец по неговото раѓање и сопружници. Меѓу нас никогаш не се случи некаков гром, сè се одвиваше постепено“, велеше Арсен.

Синот Матија е роден на 2 март 1973 година, а Арсен и Габи се венчаа набргу по неговото раѓање. Во брак останаа сè до смртта на Арсен во 2015 година.

Пред тоа поминале низ голема трагедија. Габи го изгубила бебето откако некој ѝ се јавил додека Арсен бил на пат и лажно ѝ кажал дека загинал.

„Некој ѝ се јавил додека бев на пат и ѝ кажал дека сум настрадал во сообраќајна несреќа. Тој шок предизвика спонтан абортус. Габи подоцна се согласи да се омажи за мене, но дури откако ни се роди синот Матија“, се присетуваше Арсен.

Борба за живот

Едно од најголемите искушенија следувало во 2004 година, кога Арсен во Падова бил подложен на трансплантација на црн дроб. Тешките денови во болницата ги доживувал како можност да се соочи со самиот себе и да го преиспита својот живот.

„Во болницата имав своја соба, а на ѕидот висеше слика на распнатиот Христос. Гледав како неговата сенка во текот на денот се менува. Имав телевизор и ЦД-плеер, но ниту еднаш не ги вклучив. Сакав да се соочам со самиот себе. Кажано борхесовски, тоа беше пат кон себе. Додека живееме во овој хаос, сме свесни за другите, а најмалку за себе. Болеста ми даде можност да се спознаам“, зборуваше Арсен.

„Ќе го чував до последниот миг“

По неговата смрт, Габи со голема нежност зборуваше за заедничкиот живот, не криејќи дека Арсен не бил секогаш едноставен човек. И покрај тоа, беше сигурна дека добро знаел каква животна сопатничка имал покрај себе.

„Моето почитување кон Арсен беше огромно, каков и да беше мангуп. Тој добро знаеше дека во мене ќе најде жена која ќе го поддржува до последниот миг, која ќе се грижи за него, ќе го чува, ќе биде на негова страна и никогаш нема да каже нешто грдо“, рече Габи по смртта на својот сопруг.

Од друга страна, Арсен велеше дека токму животот со Габи го смета за свој најголем успех.

„Кога покрај себе имате некој како Габи, не можете да бидете несреќни“, велеше Дедиќ.

Обичен пар со необична љубов

Иако важеа за еден од најпознатите уметнички парови на просторот на поранешна Југославија, нивниот заеднички живот не се разликуваше многу од животот на другите сопружници. Имало љубов и нежност, но и секојдневни расправии, за кои Арсен често знаеше да се шегува.

„И вчера се скаравме. Ѝ реков дека мојот живот се сведе на тоа да ја слушам како ја суши косата, сечка храна, ѝ се јавува на внуката... А сè што сакам е да ѝ отсвирам. Не ми е лесно“, велеше Арсен.

Нивната љубовна приказна траеше повеќе од четири децении. Арсен почина на 17 август 2015 година, додека Габи почина на 11 август 2025 година, само два месеца по смртта на нивниот син Матија.