„Октоберфест“ почнува во јужниот германски град Минхен, а се очекува познатиот фестивал на пивото да привлече околу шест милиони посетители од целиот свет.

Новиот минхенски градоначалник Доминик Краузе од партијата на Зелените напладне ќе го отвори 191-то издание на „Октоберфест“ на фестивалскиот простор Терезиенвизе, со традиционалното отворање на првото буре пиво со извикот „O'zapft is“, баварски израз што значи „Отворено е“.

Вниманието ќе го привлече и прашањето колку удари со чекан ќе му бидат потребни на 36-годишниот Краузе за да го отвори бурето на својот прв „Октоберфест“ во својство на градоначалник.

Според традицијата, Краузе првиот литар пиво ќе му го врачи на баварскиот премиер Маркус Зедер од конзервативната Христијанско-социјална унија (CSU), и покрај честите политички судири меѓу Зедер и Зелените.

Дури потоа пивото може да почне да се точи во фестивалските шатори.

Во текот на 16 дена, сè до 4 октомври, посетителите ќе можат да уживаат во пивските шатори, забавните атракции, традиционалната баварска храна и музика во живо, а многумина ќе облечат традиционални носии – дирндл и ледерхозен.

Се очекува времето на првиот ден од фестивалот да биде идеално, со ведро небо и температури до 24 степени Целзиусови.

Фестивалот, локално познат како „Wiesn“, се смета за најголем фестивал на пивото во светот.

Зајакнати безбедносни мерки

Властите повторно ги зајакнаа безбедносните мерки. Минатата година фестивалот можеби во последен момент избегна трагедија во втората сабота, кога голем број посетители кои истовремено се обидуваа да влезат и да излезат од просторот ги принудија организаторите накратко да го затворат фестивалскиот простор поради опасната гужва. Сведоците опишуваа сцени на „масовна паника“.

Меѓу новите мерки оваа година се координациски и надзорен центар, додека камерите со помош на вештачка интелигенција би требало во рана фаза да откриваат големи гужви.

На подрачјето на фестивалот важат забрана за носење ножеви и зона на забрането летање, особено за дронови. Посетителите мора да поминат безбедносни проверки на влезовите, големите торби се забранети, а консумирањето канабис не е дозволено.

Околу 600 полицајци ќе бидат ангажирани на подрачјето на фестивалот. Полициската станица „Wiesn“ ќе ја поддржуваат баварската интервентна полиција, специјализирани истражители за џепарење, како и полицајци од осум земји.